Ֆուտբոլային գործակալ Տիգրան Մկրտչյանը հաստատել է, որ ղազախական ակումբները հետաքրքրված են ամերիկյան «Ռեալ Սոլթ Լեյքի» հարձակվող Յուրա Մովսիսյանի եւ թուրքական «Բեշիկթաշի» կիսապաշտպան Արաս Օզբիլիսի ծառայություններով: Մովսիսյանի ու Օզբիլիսի տեղափոխություններով զբաղվող գործակալի խոսքով՝ Ղազախստանից ստացված առաջարկներն առաջնային չեն հայ ֆուտբոլիստների համար:
«Իրականում, այդ հարցով բանակցություններ ընթանում են, սակայն կան շատ մանրուքներ: Օրինակ՝ 2 ֆուտբոլիստների աշխատավարձի հարցը: Եթե Յուրա Մովսիսյանի պայմանագիրը «Ռեալ Սոլթ Լեյքի» հետ ավարտվում է, ապա Արաս Օզբիլիսը մնում է «Բեշիկթաշի» խաղացող: Նրանց՝ Ղազախստան տեղափոխվելու հավանականությունն իրական է, սակայն դա առաջնային տարբերակ չէ ֆուտբոլիստների համար: Պետք է հասկանալ, որ Յուրան ու Արասն ունեն կարիերան շարունակելու եւս մի քանի տարբերակներ: Մովսիսյանին հրավիրում են Եվրոպա, իսկ Օզբիլիսին՝ Ռուսաստան: Դեռ պարզ չէ, թե ինչպես ամեն բան կդասավորվի:
Ըստ ինձ՝ Ղազախստանն այժմ ունի բարձր մակարդակի առաջնություն, իսկ «Աստանան» ու «Կայրաթը» ամուր եվրոպական թիմեր են»,- գործակալի խոսքը մեջբերում է Sport.kz-ն:
Հիշեցնենք, որ Հայաստանի հավաքականի նախկին հարձակվող Յուրա Մովսիսյանը 2016-ին Մոսկվայի «Սպարտակից» է տեղափոխվել «Ռեալ Սոլթ Լեյք», որի կազմում MLS-ի այս մրցաշրջանում անցկացրել է 28 խաղ եւ խփել է 7 գոլ: Հուլիսից Մովսիսյանը միայն մեկ անգամ է հայտնվել մեկնարկային կազմում: Վերջերս հայ հարձակվողը հայտարարել էր, որ մտադիր չէ համակերպվել ամերիկյան թիմի պահեստային խաղացողի կարգավիճակի հետ եւ ունի առաջարկներ այլ ակումբներից:
27-ամյա Արաս Օզբիլիսն էլ 2016-ին է միացել «Բեշիկթաշին», որի գլխավոր թիմում գրեթե չի խաղում եւ մեծամասամբ մասնակցում է երկրորդ թիմի հանդիպումներին:Հետևեք NEWS.am SPORT-ին Facebook-ում, Twitter և Telegram-ում