ՀՖՖ նախագահի և Գործկոմի անդամների թեկնածուների առաջադրման կարգն ու պահանջները

Հայաստանի ֆուտբոլի ֆեդերացիայի Գործադիր կոմիտեն ՀՖՖ 28-րդ հերթական ընտրական ժողովի անցկացման օր է ընտրել դեկտեմբերի 21-ը։ Այն կմեկնարկի ժամը 12։00-ին` ՀՖՖ գլխավոր գրասենյակում (Խանջյան 27):

Ժողովի ընթացքում ի թիվս այլ հարցերի կանցկացվեն նաև Գործադիր կոմիտեի ու ՀՖՖ նախագահի ընտրություններ։

Հայաստանի ֆուտբոլի ֆեդերացիան ներկայացրել է կազմակերպության նախագահի և գործադիր կոմիտեի ընտրության կարգը:

Թեկնածություն առաջադրելիս անհրաժեշտ է հաշվի առնել ՀՀ օրենսդրության, ՀՖՖ կանոնադրության և ՀՖՖ ընտրական կանոնակարգի համապատասխան կարգավորումները։

Մասնավորապես՝

ՀՖՖ կանոնադրության 31-րդ կետի 3-րդ ենթակետի համաձայն՝ յուրաքանչյուր Անդամ կարող է առաջարկել մեկ թեկնածու ՀՖՖ նախագահի և մեկ թեկնածու Գործադիր կոմիտեի անդամի թափուր տեղերի համար։ Այնուամենայնիվ, Անդամները կարող են Գործադիր կոմիտեում ներկայացված լինել միայն մեկ անդամով։

ՀՖՖ նախագահի և ՀՖՖ գործադիր կոմիտեի անդամի պաշտոնում առաջադրվելու համար թեկնածուները պետք է համապատասխանեն ՀՖՖ կանոնադրության 31-րդ կետի 4-րդ ենթակետով սահմանված հետևյալ պահանջներին․

ա) մինչև թեկնածու առաջադրվելը վերջին հինգ տարիներից երկուսի ընթացքում ակտիվ դերակատարում ունենալ ՀՀ-ում ֆուտբոլի բնագավառում (Պաշտոնատար անձ1, նախկին ֆուտբոլիստ (դիմելու պահին կարիերան ավարտած), կամ սպորտում այլ կերպ ներգրավված անձ (մարզական լրագրող, մեկնաբան, իրավաբան և այլն),

բ) լինել Հայաստանի Հանրապետության քաղաքացի, լինել առնվազն 25 տարեկան,

գ) տվյալ պաշտոնի հետ անհամատեղելի որևէ հանցագործության համար նախկինում դատապարտված չլինել,

դ) չգտնվել սնանկության գործընթացում:

ՀՖՖ նախագահի և ՀՖՖ գործադիր կոմիտեի անդամի պաշտոնում թեկնածու առաջադրելու համար անդամները պետք է ՀՖՖ ներկայացնեն հետևյալ տեղեկությունները/փաստաթղթերը.

1. Կենսագրություն՝ ֆուտբոլի բնագավառում գործունեության մանրամասն նկարագրությամբ (մասնավորապես՝ վերջին հինգ տարիներից երկուսի ընթացքում),
2. Անձնագրի և/կամ նույնականացման քարտի պատճեն (նույնականացման քարտի կամ կենսաչափական անձնագրի տրամադրման դեպքում նաև տեղեկություններ բնակության հասցեի վերաբերյալ),
3. ՀՖՖ նախագահի պաշտոնում թեկնածու առաջադրելու դեպքում ՀՖՖ Անդամի համապատասխան իրավասու մարմնի կողմից հավաստագիր, որ ՀՖՖ նախագահի անդամի պաշտոնում առաջադրված թեկնածուն համապատասխանում է Կանոնադրության 31-րդ կետի 4-րդ ենթակետով նախատեսված պահանջներին,
4. ՀՖՖ գործադիր կոմիտեի անդամի պաշտոնում թեկնածու առաջադրելու դեպքում ՀՖՖ Անդամի համապատասխան իրավասու մարմնի կողմից հավաստագիր, որ ՀՖՖ գործադիր կոմիտեի անդամի պաշտոնում առաջադրված թեկնածուն համապատասխանում է Կանոնադրության 31-րդ կետի 4-րդ ենթակետով նախատեսված պահանջներին,
5. ՀՀ իրավասու մարմնի կողմից տրամադրված դատվածության տեղեկանք,
6. ՀՀ իրավասու մարմնի կողմից տրամադրված սնանկության գործընթացում չգտնվելու վերաբերյալ տեղեկանք:

ՀՖՖ նախագահի և ՀՖՖ գործադիր կոմիտեի անդամի պաշտոնում թեկնածու առաջադրելու համար Անդամները նշված փաստաթղթերը/տեղեկությունները ՀՖՖ պետք է ներկայացնեն մինչև 2026թ.-ի նոյեմբերի 20-ը՝ ժամը 24:00-ն [email protected] էլեկտրոնային փոստի հասցեին ուղարկելու միջոցով։ Մինչև ընտրվելը թեկնածուն անցնում է համապատասխանության ստուգում ՀՖՖ Ընտրական կոմիտեի կողմից` ՀՖՖ կանոնադրության և Ընտրական կանոնակարգի դրույթների համաձայն: Համապատասխանության ստուգում անցնելու համար յուրաքանչյուր թեկնածու պետք է լրացնի համապատասխան հարցաթերթը և լրացված տարբերակը հիմնական փաստաթղթերի փաթեթի հետ մեկտեղ ներկայացնի ՀՖՖ մինչև 2026թ.-ի նոյեմբերի 20-ը՝ ժամը 24:00-ն [email protected] էլեկտրոնային փոստի հասցեին ուղարկելու միջոցով:

Նշենք, որ թեկնածուների՝ ՀՖՖ ընտրական կոմիտեի կողմից հաստատված վերջնական և պաշտոնական ցուցակը տրամադրվում է ՀՖՖ Անդամներին ՀՖՖ նախագահի և ՀՖՖ գործադիր կոմիտեի անդամների ընտրության համար հրավիրվող ժողովից առնվազն 10 օր առաջ։

Հետևեք NEWS.am SPORT-ին Facebook-ում, Twitter և Telegram-ում