Բռնցքամարտի ԱԱ. Ռաֆայել Հովհաննիսյանը՝ բրոնզե մեդալակիր

Եվրոպայի փոխչեմպիոն Ռաֆայել Հովհաննիսյանը մարզական կարիերայում առաջին մեդալը նվաճեց մեծահասակների աշխարհի առաջնությունում:

Դուբայում անցկացվող տղամարդկանց բռնցքամարտի աշխարհի առաջնությունում 86 կգ քաշային կարգի կիսաեզրափակիչում Ռաֆայել Հովհաննիսյանը մենամարտեց բելառուս Ալեկսեի Ալֆյոնովի հետ:

Առաջին ռաունդի մեկնարկից մեկ րոպե անց բելառուս բռնցքամարտիկը նոկաուտի ենթարկեց Հովհաննիսյանը, հայ բռնցքամարտիկը հավասարակշռությունը կորցրեց եւ ընկավ՝ մի քանի վայրկյան անշարժ մնալով: Ռինգի մրցավարն անմիջապես կանգնեցրեց մենամարտը, Ռաֆայել Հովհաննիսյանին բժշկական օգնություն ցուցաբերեցին: Րոպեներ անց Ռաֆայել Հովհաննիսյանը ոտքի կանգնեց եւ մասնակցեց իր պարգեւատրմանը:

Հովհաննիսյանը մեկնարկել էր 1/8 եզրափակիչից, որտեղ 5:0 հաշվով վստահ հաղթանակ էր տարել Իսրայելի ներկայացուցիչ Յան Զակի նկատմամբ:

Հովհաննիսյանն ապահովեց իր առաջին մեդալը մեծահասակների աշխարհի առաջնություններում: Քառորդ եզրափակիչում Հովհաննիսյանը մենամարտեց  էկվադորցի  Մարիո Խավիեր Սուարեսի հետ եւ հաղթեց 4:1 հաշվով:

Հայաստանի հավաքականի կազմում աշխարհի առաջնության բրոնզե մեդալակիրներ են դարձել նաեւ Արթուր Բազեյանը (60կգ) եւ Հովհաննես Բաչկովը (67կգ):

Երեկոյան մրցահերթում ռինգ դուրս կգան Ռուդոլֆ Գարբոյանը (51 կգ) եւ Դավիթ Չալոյանը (+92 կգ):

Հետևեք NEWS.am SPORT-ին Facebook-ում, Twitter և Telegram-ում