Արթուր Սողոմոնյան․ «Փյունիկը» ստացել եմ առանց որեւէ գումարի եւ պատրաստ եմ առանց գումարի էլ փոխանցել

Ես ակումբը ստացել եմ առանց որեւէ գումարի եւ պատրաստ եմ առանց գումարի էլ հանձնել, փոխանցել: Ակումբն ունի որոշակի գույք, սեփականություն, որոնք ունեն շուկայական գին: Վաճառք ասելով՝ նկատի ունեմ դա:

Այս մասին NEWS.am Sport-ի թղթակցի հետ զրույցում ասաց «Փյունիկ» ֆուտբոլային ակումբի սեփականատեր Արթուր Սողոմոնյանը:

Սեպտեմբերի 18-ին Արթուր Սողոմոնյանը հայտարարեց ակումբը վաճառելու որոշման մասին: Հայտարարության մեջ ակումբի սեփականատերը մանրամասնեց, որ վաճառում է ոչ թե ակումբն ամբողջ ենթակառուցվածքներով, այլ միայն բարձրագույն խմբի թիմը, ինքը շարունակում է ղեկավարել «Փյունիկի» ակադեմիան, պահպանում է մանկապատանեկան թիմերը:

«Ճիշտն ասած՝ ես միշտ եղել եմ պարզ ու ուզում եմ այդպես էլ մնամ: Ես վաճառում եմ առաջին թիմը՝ ակումբի պրոֆեսիոնալ մասը: Որ ասում եմ՝ վաճառում եմ, դա այն չէ, ինչ հասկանում են բոլորը: Խոսքն այն չէ, որ ես գումար եմ ակնկալում թիմի դիմաց: Վաճառում եմ թիմին պատկանող գույքը: Ակումբը ես անվճար եմ ստացել եւ պատրաստ եմ անվճար փոխանցել հաջորդ ղեկավարողին, եթե տեսնեմ գնորդի կողմից լրջություն: Դա վերաբերում է պրոֆեսիոնալ մասին:

Ինչ վերաբերում է ակումբի մանկապատանեկան, երիտասարդական ակադեմիային, ինձ համար սա մի փոքր ուրիշ պատմություն է: Ես ակադեմիան պահելու եմ, շարունակելու եմ իմ ներդրումները: Մենք ունենք ծրագիր եւ այդ ծրագրով շարժվում ենք առաջ: Այն երեխաները, որոնք գալիս են «Փյունիկ», միայն 1-2 տոկոսն են դառնում պրոֆեսիոնալ ֆուտբոլիստ, բայց մենք աշխատում ենք բոլորի հետ, ինչն ինձ համար շատ կարեւոր է: Ես ուզում եմ շարունակել իմ այդ գործը: Ինչ վերաբերում է ակադեմիային, եթե գնորդ չեղավ, ես այն պահելու եմ:

Մեր ակադեմիան մասնակցում է Հայաստանի առաջնության առաջին լիգայում ու կշարունակի իր մասնակցությունը: Ես ուզում եմ ծնողներին հանգստացնել, որ կապված երեխաների հետ, ոչինչ չի փոխվելու: Մենք այնտեղ սպասում ենք շինթույլտվության, պատրաստվում ենք կառուցել նոր հանդերձարաններ, արդեն Իտալիայից ստացել ենք նոր խոտածածկ, շուտով փոխելու ենք դաշտերի խոտածածկը: Մենք ունենք մեր ծրագիրը եւ դրանով շարժվելու ենք առաջ:

Ինչպես արդեն ասել էի՝ 7,5 տարվա ընթացքում ես շուրջ 20 միլիոն դոլարի ներդրում եմ արել: Վաճառել ասելով, խոսքը չի գնում այս գումարների մասին: Ինչպես ասացի՝ ակումբը ես առանց գումարի եմ ստացել, առանց գումարի էլ կհանձնեմ նրան, ով պատրաստ է ղեկավարել եւ լուրջ ներդրումներ անել, պահպանել ակումբի պատմությունը:

Այսօր դեռ գնորդ չկա: Դեռ որեւէ մեկի հետ բանակցությունների մեջ չենք: Անցած տարի խոսում էի արտասահմանցի երկու կազմակերպությունների հետ: Նրանք ուսումնասիրեցին հայկական ֆուտբոլը եւ մերժեցին: Նախքան այդ, լրջորեն մտածում էին դրա մասին: Նրանք էլ հասկացան, որ այսօր հայկական ֆուտբոլում ոչ պրոֆեսիոնալ մոտեցում է եւ հարկ չհամարեցին մտնել այդ ամենի մեջ:

Գնորդների թեմայի շուրջ շատ են խոսակցությունները, բամբասանքները: Ասում են, թե «Վիվառոն» է ուզում գնել, բայց դա չի համապատասխանում իրականությանը: Սա նույնիսկ անօրինական է, քանի որ խաղադրույքային կազմակերպության սեփականատերը իրավունք չունի ֆուտբոլային թիմ պահել: Այն, ինչ այսօր կատարվում է «Նոա» ակումբի հետ, չեմ ցանկանում մեկնաբանել, բայց չեմ կարծում, որ դա ճիշտ է: Հավաստիացնում եմ, որ այդպիսի բանակցություններ չկան: Սպասողական վիճակ է: Եթե տեսնեմ լուրջ մարդիկ, սիրով ակումբը կփոխանցեմ նրանց:

Ակումբն ունի որոշակի գույք, սեփականություն, որոնք ունեն շուկայական գին: Վաճառք ասելով՝ նկատի ունեմ դա: Ինչ վերաբերում է ակումբի անվանը, թիմին, ես այդ ամենը ստացել եմ առանց որեւէ գումարի եւ առանց գումարի էլ պատրաստ եմ հանձնել»,- ասաց Արթուր Սողոմոնյանը:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում