Նադալ․ Իսպանական սպորտի մեծագույն լեգենդը հեռանում է (ֆոտո)

«Մեծ սաղավարտի» մրցաշարերի 20-ակի հաղթող, իսպանացի թենիսիստ Ռաֆայել Նադալն արձագանքել է բասկետբոլի Իսպանիայի հավաքականի ծանր հարձակվող Պաու Գազոլի որոշմանը պրոֆեսիոնալ կարիերան ավարտելու մասին։

«Իսպանական սպորտի մեծագույն լեգենդը հեռանում է։ Շատ բան կցանկանայի ասել, բայց գլխավորը՝ շնորհակալություն, Պաու»,- Թվիթերում գրել է Նադալը՝ հրապարակելով Գազոլի լուսանկարը։

Se retira una gran leyenda de nuestro deporte! Mucho que decir, pero sobre todo…. #GraciasPau#GràciesPau#ThankyouPau pic.twitter.com/oOmqanyujL

— Rafa Nadal (@RafaelNadal) October 5, 2021

Պաու Գազոլը պրոֆեսիոնալ կարիերան սկսել է 1998 թվականին։ 1999-2001-ին «Բարսելոնայում» հանդես գալուց հետո տեղափոխվել է Բասկետբոլի ազգային ասոցիացիա (NBA)։ 2001-2008-ին նա ներկայացրել է «Մեմֆիս Գրիզլիսը», 2008-2014-ին ՝ «Լոս Անջելես Լեյքերսը», որի հետ երկու անգամ նվաճել է NBA-ի չեմպիոնի կոչումը։ 2014-2016-ին Պաու Գազոլը խաղացել է «Չիկագո Բուլզում», 2016-2019-ին՝ «Սան Անտոնիո Սփյորսում», 2019-ին՝ «Միլուոկի Բաքսում», իսկ 2021-ից՝ «Բարսելոնայում»։

Պաու Գազոլը Իսպանիայի հավաքականի հետ դարձել է կրկնակի օլիմպիական փոխչեմպիոն (2008, 2012), Եվրոպայի եռակի չեմպիոն (2009, 2011, 2015), 2006թ․ աշխարհի չեմպիոն։

Հետևեք NEWS.am SPORT-ին Facebook-ում, Twitter և Telegram-ում