Լոնդոնի «Արսենալի» ծագումով թուրք կիսապաշտպան Մեսութ Օզիլը դեմ է արտահայտվել ֆինանսական ճգնաժամի պայմաններում թիմի ֆուտբոլիստների աշխատավարձը կրճատելու առաջարկին, հայտնում է The Mirror-ը:
«Արսենալի» ղեկավարությունը թիմի ֆուտբոլիստներին առաջարկել է Չեմպիոնների լիգայի ուղեգիր չնվաճելու դեպքում համաձայնել աշխատավարձերի 12.5 տոկոսով կրճատմանը, սակայն Օզիլն ու ևս 2 ֆուտբոլիստ, որոնց անունները չեն նշվում, դեմ են արտահայտվել առաջարկին:
«Մենք համաձայն չենք այդ առաջարկին, քանի որ նախորդ տարի «Արսենալի» ունեցած եկամուտը հնարավորություն է տալիս ակումբին ամբողջությամբ վճարել աշխատավարձերը»,- նշել է Օզիլի գործակալը՝ թուրք Էրքյուտ Սոգյուտը:
Ավելի վաղ աշխատավարձերի կրճատման առաջարկն ընդունել էին եվրոպական ֆուտբոլի առաջատար ակումբների՝ «Ռեալի», «Բարսելոնայի», ՊՍԺ-ի, «Լիվերպուլի», «Չելսիի», «Մանչեսթեր Յունայթեդի», «Մանչեսթեր Սիթիի» և մի շարք այլ թիմերի ֆուտբոլիստներ:
Հետևեք NEWS.am SPORT-ին Facebook-ում, Twitter և Telegram-ում