Սուսերամարտի կրկնակի օլիմպիական չեմպիոն (2000թ. Սիդնեյ, 2004թ. Աթենք), աշխարհի ու Եվրոպայի չեմպիոն ռուսաստանցի Կարինա Ազնավուրյանը, թեեւ արդեն հեռացել է մեծ սպորտից, բայց Օլիմպիական խաղերի ժամանակ իրեն կրկին զգում է մարզիկի պես։
NEWS.am Sport-ի թղթակցի հետ զրույցում անվանի մարզուհին խոսեց Լոնդոնում ընթացող Օլիմպիական խաղերից ստացած իր տպավորությունների մասին:
Տիկին Ազնավուրյան, ի՞նչն ամենից շատ տպավորեց Լոնդոնի Օլիմպիական խաղերի բացման արարողությունում։
Այն, թե ինչպես բոցավառեցին Օլիմպիական կրակը: Շատ գեղեցիկ էր եւ յուօրինակ:
Ո՞ր Օլիմպիական խաղերի բացումն է եղել ամենագեղեցիկը, ըստ Ձեզ:
Ես առաջին անգամ էի դիտում Խաղերի բացման արարողությունը: Ես միշտ եղել եմ մասնակից: Եվ հենց դեպքի վայրից եմ հետեւել արարողությանը: Այս անգամ դիտողի դերում էի:
Ինչպե՞ս է դիտել Օլիմպիական խաղերը ոչ թե մասնակցի, այլ մարզասերի կարգավիճակում:
Շատ դժվար: Ես ինձ դեռ մարզիկ եմ զգում եւ մեջս ամեն բան խառնվում է, երբ հետեւում եմ Խաղերին:
Ո՞ր թիմերին եք սատարում:
Ռուսաստանին եւ Հայաստանին, բնականաբար: Ուշադիր հետեւում եմ հայ մարզիկների ելույթներին։ Չէ որ նրանք մեր դրոշն են ներկայացնում:
Ո՞ւմ գիտեք հայ մարզիկներից:
Երեկ Արսեն Գալստյանը բերեց Ռուսաստանին առաջին ոսկին: Դա շատ հաճելի իրադարձություն էր: Իսկ Հայաստանի մարզիկները կարծում եմ` մեդալների համար կարող են պայքարել: Սա սպորտ է եւ ամեն արդյունք սպասելի է:
Ո՞ր մարզաձեւերին եք հետեւում:
Իմ մարզաձեւը, ինչպես նաեւ սիրում եմ ուժայինները` ըմբշամարտ:
Ըստ Ձեզ, ովքե՞ր հաջողության կհասնեն սուսերամարտում:
Կարծում եմ` Իտալիան կհասնի առավելագույն արդյունքի:
Օլիմիպիական երեք խաղերի եք մասնակցել, ո՞րն է ամենից հիշվողը:
1996-ին Ատլանտայում:
Նրա համար, որ Ձեր առաջի՞ն Օլիմպիական խաղերն էր:
ԱՄՆ-ում էր անցկացվում. այ հենց դրա համար: Լրիվ այլ մակարդակ էր: Ինչպես ամերիկացիներն էին պատրաստվել խաղերին, ոչ ոք չի պատրաստվել:
Զրուցեց Վերա Մարտիրոսյանը
Հետևեք NEWS.am SPORT-ին Facebook-ում, Twitter և Telegram-ում