Մադրիդի «Ռեալը», մայիսի 4-ին նվազագույն հաշվով հաղթելով անգլիական «Մանչեսթեր Սիթիին», Չեմպիոնների լիգայի ընթացիկ մրցաշարում 10-րդ խաղն է անցկացրել առանց բաց թողած գոլի, գրում է Marca-ն:
Այդ ցուցանիշով Արքայական ակումբը հավասարվել է Լոնդոնի «Արսենալին», որը 2005/2006 մրցաշրջանում Չեմպիոնների լիգայում գոլ բաց չէր թողել 10 խաղերում:
Չեմպիոնների լիգայի ընթացիկ մրցաշարում «Ռեալն» անցկացրած 12 հանդիպումներում գոլ է բաց թողել 2 խաղերում՝ Դոնեցկի «Շախտյորից» (4:3) եւ գերմանական «Վոլֆսբուրգից» (0:2):
Եթե Զինեդին Զիդանի թիմը մայիսի 28-ին Միլանում կայանալիք եզրափակիչում գոլ բաց չթողնի Մադրիդի «Աթլետիկոյից», կդառնա բացարձակ ռեկորդակիր:
«Ռեալի» կոստառիկացի դարպասապահ Կեյլոր Նավասն էլ 9-րդ «չոր» խաղն անցկացրեց Չեմպիոնների լիգայի այս մրցաշարում՝ կրկնելով Սանտյագո Կանիսարեսի ռեկորդը: Իսպանացի դարպասապահը «Վալենսիայի» կազմում գոլ բաց չէր թողել Չեմպիոնների լիգայի 2000/2001թթ. մրցաշարի 9 խաղերում:
Հետևեք NEWS.am SPORT-ին Facebook-ում, Twitter և Telegram-ում