Հայաստանի Գավաթ. Եզրափակիչին ընդառաջ

«Բանանցն» եւ «Միկան» մայիսի 4-ին կվիճարկեն ֆուտբոլի Հայաստանի գավաթի 2015/2016 թթ. խաղարկության հաղթողի կոչումը:

«Միկան» Հայաստանի գավաթակիր դարձել է 6 անգամ (2000, 2001, 2003, 2005, 2006, 2011) եւ միայն մեկ անգամ է պարտվել եզրափակիչում: Դա տեղի ունեցավ նախորդ տարի, երբ «Փյունիկն» առավելության հասավ 3:1 հաշվով:

«Բանանցը» եւս 7 անգամ խաղացել է Հայաստանի Գավաթի եզրափակիչում, բայց նվաճել է 2 տիտղոս՝ 1992-ին ու 2007-ին:

Այս դիմակայությունն առանձնանում է նաեւ նրանով, որը Հայաստանի Բարձրագույն խմբում հանդես եկող ակումբներից միայն «Բանանցն» եւ «Միկան» ունեն արտասահմանցի մարզիչներ: «Միկան» գլխավորում է ռուսաստանցի Սերգեյ Յուրանը, իսկ «Բանանցում» աշխատում է իսպանացի Տիտո Ռամալյոն:

Երեւանի Վազգեն Սարգսյանի անվան «Հանրապետական» ստադիոնում կայանալիք խաղը կսկսվի ժամը 19:00-ին։ Մուտքն ազատ է: Հանդիպումը կսպասարկի Սուրեն Բալիյանը։

Բուքմեյքերական գրասենյակները ֆավորիտ չեն տեսնում այս խաղում: 2 թիմերի հաղթանակներն էլ ստացել է 2.4 գործակից, իսկ ոչ ոքին՝ 3.2:

Հետևեք NEWS.am SPORT-ին Facebook-ում, Twitter և Telegram-ում