Գերմանական Բունդեսլիգայի չորրորդ տուրն անհաջող էր Դորտմունդի «Բորուսիայի» համար: Դորտմունդցիները հյուրընկալվել էին «Մայնցին» եւ հաղթանակի դեպքում կգլխավորեին մրցաշարային աղյուսակը, սակայն Յուրգեն Կլոպի թիմը պարտվեց գերմանացի մասնգետի նախկին թիմին: «Մայնցը» խփեց 2 անպատասխան գոլ:
Լոնդոնի «Արսենալի» դեմ Չեմպիոնների լիգայի առաջին տուրի խաղից հետո Կլոպը մի շարք փոփոխություններ էր կատարել մեկնարկային կազմում՝ պահեստայինների նստարանին թողնելով նաեւ Հայաստանի հավաքականի կիսապաշտպան Հենրիխ Մխիթարյանին:
Առաջին խաղակեսում գոլեր չգրանցվեցին: 65-րդ րոպեին «Բորուսիայի» կազմում խաղադաշտ դուրս եկան Հենրիխ Մխիթարյանը եւ իտալացի ռմբարկու Չիրո Իմոբիլեն, իսկ մեկ րոպե անց ճապոնացի հարձակվող Սինձի Օկազակին բացեց հաշիվն՝ առաջ մղելով «Մայնցին»: 70-րդ րոպեին հյուրերը կարող էին հավասարեցնել հաշիվը, սակայն Իմոբիլեն վրիպեց 11 մետրանոց հարվածից: Քիչ անց գործեց ֆուտբոլի չգրված օրենքը եւ դաշտի տերերը կրկնապատկեցին առավելությունը: «Մայնցի» երկրորդ գոլը խփեց «Բորուսիայի» գերմանացի պաշտպան Մատիաս Գինտերը, ով դարձավ ինքնագոլի հեղինակ: Վերջնամասում Յուրգեն Կլոպի թիմը չկարողացավ պատասխանել մրցակցին եւ կրեց երկրորդ պարտությունը Գերմանիայի ընթացիկ առաջնությունում:
«Բորուսիան» ունի 6 միավոր եւ «Աուգսբուրգի» հետ բաժանում է 7-8-րդ տեղերը: «Մայնցը» 8 միավորով հավասարվեց մյուս 3 առաջատարներին՝ «Բավարիային», «Հոֆֆենհայմին» ու Բունդեսլիգայի նորեկ «Պադերբորնին»:
Գերմանիայի առաջնություն, չորրորդ տուր
«Մայնց» - «Բորուսիա Դ.»՝ 2:0
Սինձի Օկազակի, 66, Մատիաս Գինտեր, 74 (ինքնագոլ)
Չիրացված 11 մետրանոց՝ Չիրո Իմոբիլե, 70 («Բորուսիա»)
Հետևեք NEWS.am SPORT-ին Facebook-ում, Twitter և Telegram-ում