Հայաստանի ներկայացուցիչ Նորայր Հախոյանը (55 կգ) Ռումինիայի մայրաքաղաք Բուխարեստում անցկացվող հունահռոմեական ոճի ըմբշամարտի աշխարհի մինչեւ 23 տարեկանների առաջնությունում իրավունք ստացավ անցկացնել բրոնզե մեդալի համար գոտեմարտ:
Հախոյանը պայքարի մեջ էր մտել նախօրեին եւ մեկնարկել 1/8 եզրափակիչից, որտեղ 2:3 հաշվով պարտվել էր վրացի Նուգզարի Տսուրցումիային: Վրացի ըմբիշը դուրս է եկել եզրափակիչ եւ Նորայրը հնարավորություն է ստացել պայքարել բրոնզե մեդալի համար: Միակ սփոփիչ գոտեմարտում հայ ըմբիշը 6:0 հաշվով հաղթեց բուլղարացի Նեդյալկո Պետրովին: Երեկոյան մրցահերթում Նորայր Հախոյանը բրոնզե մեդալը կվիճարկի ղրղզ Բալբայ Դորդոկովի հետ:
Արմեն Բաբալարյանի գլխավորած հունահռոմեական ոճի ըմբշամարտի Հայաստանի թիմի կազմում նոյեմբերի 13-ին պայքարի մեջ կմտնեն Արմեն Մելիքյանը (60 կգ), Արմեն Հակոբյանը (72 կգ) եւ Գեղամ Թորգոմյանը (82 կգ): Սլավիկ Գալստյանը (63 կգ) եւ Սերյոժա Բերնեցյանը (77 կգ) պարտություն էին կրել նախօրեին եւ լքել պայքարը:
Հիշեցնենք, որ Նորայր Հախոյանը նախորդ ամիս մասնակցել էր նաեւ Հունգարիայի մայրաքաղաք Բուդապեշտում անցկացված աշխարհի առաջնությանը, որում բրոնզե մեդալի համար գոտեմարտում 0:4 հաշվով պարտվել էր թուրք Էրկեմ Օզտուրկին:
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։