Արթուր Պետրոսյան. Յուրա Մովսիսյանի հրավիրման հարցը փակված է ֆեդերացիայի նախագահի կողմից

Ֆուտբոլի Հայաստանի ազգային հավաքականի գլխավոր մարզիչ Արթուր Պետրոսյանը մեկնաբանել է ընկերական խաղում Լիտվայի թիմից կրած պարտությունը:

«Էստոնիայի եւ Լիտվայի հավաքականները տարբերվում են իրենց խաղաոճով: Զգուշացրել էինք մեր ֆուտբոլիստներին, որ Լիտվայի թիմը դժվար մրցակից է: Այդպես էլ եղավ:

Գոհ չեմ խաղից: Ակտիվ եւ ագրեսիվ գործեցինք միայն վերջին 15 րոպեների ընթացքում: Ընդհանուր առմամբ, անատամ խաղ անցկացրեցինք:

Հարձակման գծում վստահել էինք Ադամյան – Բալեկյան զույգին, որոնց համագործակցությունը չստացվեց:

Արդյունքը կարեւոր է, սակայն ընկերական խաղերում մենք նաեւ այլ կարեւոր նպատակներ ունենք: Հնարավորություն տվեցինք նաեւ երիտասարդ ֆուտբոլիստների, փորձարկումներ արեցինք:

Ոչ միայն Մխիթարյանի, այլեւ թիմի խաղը չստացվեց: Մեր ամենամեծ խնդիրն այն էր, որ չէինք կարողանում կենտրոնական գոտիները փակել:

Պարտվեցինք, սակայն խաղն օգտակար էր մարզչական շտաբի համար: Մայիսին եւ հունիսին կայանալիք խաղերում արդեն փորձարկումներ չեն լինելու. Ըընտրելու ենք պաշտոնական խաղերին մոտ մարտավարություն:

Նորբերտո Բրիասկոն արժանի ֆուտբոլիստ է, սակայն պետք չէ մոռանալ, որ նրա համար ամեն ինչ այստեղ նոր էր: Ապագայում նա շատ օգտակար կլինի մեր հավաքականին:

Յուրա Մովսիսյանի հրավիրման հարցը փակված է ֆեդերացիայի նախագահի կողմից: Չեմ կարող պատասխանել այդ հարցին:

Մեր նպատակը Ազգերի լիգային պատրաստ լինելն է, իսկ ընկերական խաղերը այդ ճանապարհին շատ կարեւոր նշանակություն ունեն: Այսօրվա խաղից հետո վերջնականապես կողմնորոշվեցինք այն խաղային սխեմաների հարցում, որոնք առավել համապատասխան են մեր հավաքականին: Հնարավոր է, որ հաջորդ հավաքներին նոր ֆուտբոլիստներ հրավիրվեն: Չի բացառվում, որ մարզավիճակի բարելավման դեպքում հրավիրվի նաեւ Կառլեն Մկրտչյանը»,- ասել է Արթուր Պետրոսյանը:

Հիշեցնենք, որ Երեւանում տեղի ունեցած ընկերական խաղում Հայաստանի հավաքականը լիտվացիներին պարտվել է 0:1 հաշվով:

Սամվել Սուքիասյան

Ֆոտո՝ Արսեն Սարգսյան