Դորտմունդի «Բորուսիայի» ղեկավարը Հենրիխ Մխիթարյանի վերադարձը համարում է քիչ հավանական

Դորտմունդի «Բորուսիայի» գլխավոր տնօրեն Հանս-Յահիմ Վացկեն մեկնաբանել է «Մանչեսթեր Յունայթեդի» եւ Հայաստանի հավաքականի կիսապաշտպան Հենրիխ Մխիթարյանի վերադառնալու մասին լուրերը: Գերմանական ակումբի ղեկավարի խոսքով՝ ձմեռային տրանսֆերային պատուհանի ընթացքում դա գրեթե անհավանական է:

«Մխիթարյանի՝ «Մանչեսթեր Յունայթեդ» տեղափոխության ֆինանսական մանրամասները ես գիտեմ բոլորից լավ: Այդ պատճառով նրա վերադարձը հնարավոր է միայն իրադարձությունների անհավանական զարգացումների դեպքում»,- Հանս-Յահիմ Վացկեի խոսքը մեջբերում է գերմանական Bild-ը:

Հիշեցնենք, որ Հենրիխ Մխիթարյանը Դորտմունդի «Բորուսիայի» կազմում հանդես եկել է 2013-2016 թվականներին: Վերջին շրջանում 28-ամյա կիսապաշտպանը հազվադեպ է խաղալու հնարավորություն ստանում անգլիական ակումբում: Նա հայտավորվել է «Մանչեսթեր Յունայթեդի» նախորդ 11 խաղերից միայն երեքին՝ 3 դեպքում էլ դուրս գալով փոխարինման: Հենրիխ Մխիթարյանի ծառայություններով լրջորեն հետաքրքրված է իտալական «Ինտերը», որը ձմեռային տրանսֆերային պատուհանի ընթացքում կփորձի վարձակալել հայ ֆուտբոլիստին՝ հետագայում նրա տրանսֆերային իրավունքը գնելու հնարավորությամբ:

Ավելի վաղ «Մանչեսթեր Յունայթեդի» գլխավոր մարզիչ Ժոզե Մոուրինյոն հայտարարել էր, որ ձմռանն անգլիական ակումբը կփորձի վաճառել հայ կիսապաշտպանին։ Հենրիխ Մխիթարյանի տրանսֆերային արժեքն անգլիական ակումբը գնահատում է 35 միլիոն ֆունտ ստերլինգ։