Մոսկվայի «Արարատի» հետ երկկողմ համաձայնությամբ պայմանագիրը խզած ռուս հարձակվող Ռոման Պավլյուչենկոն հայկական ակումբի երկրպագուներից ներողություն է խնդրել ստեղծված իրավիճակի համար: Օրեր առաջ «Արարատը» Ռուսաստանի հավաքականի նախկին ֆուտբոլիստին մեղադրել էր առանց ակումբի թույլտվության արձակուրդի մեկնելու համար եւ նշել, որ նրա բոնուսները կրճատվելու են 90 տոկոսով: Դրանից հետո Պավլյուչենկոն հայտարարել էր, որ այդ որոշումը բողոքարկելու է Ռուսաստանի ֆուտբոլային միության վիճելի հարցերի բաժնում:
«Ակումբի ղեկավարությունն ու ես որոշեցինք խզել պայմանագիրը երկկողմ համաձայնությամբ: Ցանկանում եմ երկրպագուներից, թիմակիցներիցս ու «Արարատը» բոլոր ստեղծողներից ներողություն խնդրել վերջերս մամուլում բարձրացված դատարկ աղմուկի համար: Ամեն բան տեղի ունեցավ անիմաստ թյուրիմացության պատճառով: Հիմա բոլոր վիճելի հարցերը հարթվել են, եւ իմ ու ակումբի միջեւ ոչ մի խնդիր չկա: Մենք բաժանվում ենք որպես ընկերներ:
«Արարատում» աշխատանքն առանձնահատուկ ու չտեսնված էր: Հաճելի էր լինել այսպիսի մեծ ու ամբիցիոզ նախագծի մի մասը: Վստահ եմ, որ շուտով «Արարատը» կհասնի մարզական մեծ բարձունքների: Միշտ կաջակցեմ այս վառ թիմին»,- Պավլյուչենկոյի խոսքը մեջբերում է ակումբի մամուլի ծառայությունը:
Հիշեցնենք, որ ռուս հարձակվողն այս մրցաշրջանից առաջ էր միացել «Արարատին», որի կազմում Ռուսաստանի Երկրորդ դիվիզիոնի առաջնության «Կենտրոն» գոտու ընթացիկ մրցաշարում մասնակցել է 12 խաղի եւ խփել է 9 գոլ:
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։