Արթուր Պետրոսյան. Ուզբեկստանի հավաքականի հետ խաղալու ընտրությունը պատահական չէ
14:34 1 դեկտեմբերի, 2016Ուզբեկստանի հավաքականը գրեթե նույն մակարդակի թիմ է, ինչ մեր ապագա մրցակից Ղազախստանը, հայտարարել է ֆուտբոլի Հայաստանի ազգային հավաքականի գլխավոր մարզիչ Արթուր Պետրոսյանը, որը պատմել է Ուզբեկստանի հետ ընկերական հանդիպում անցկացնելու որոշման մասին:
«Քանի որ փետրվարին ՖԻՖԱ-ի կողմից նախատեսված չէ ընկերական հանդիպումների հատուկ օր, իսկ մենք անպայման ուզում էինք ընկերական հանդիպում անցկացնել, ընտրել ենք այնպիսի ժամանակահատված, երբ մեր գրեթե բոլոր ակումբները կգտնվեն մեկ վայրում, ինչը կհեշտացնի նրանց կողմից հավաքականին խաղացողների տրամադրումը: Այդ նույն ժամանակահատվածում Թուրքիայում է գտնվելու նաեւ Ուզբեկստանի հավաքականը, որը գրեթե նույն մակարդակի թիմ է, ինչ մեր ապագա մրցակից Ղազախստանի հավաքականը: Հետեւաբար, հենց Ուզբեկստանի հավաքականի հետ ընկերական հանդիպում անցկացնելու մեր ընտրությունը պատահական չէ:
Ավելացնեմ նաեւ, որ խաղալու ենք հիմնականում Հայաստանի առաջնությունում հանդես եկող ֆուտբոլիստներով: Սա մեզ համար շատ լավ հնարավորություն կլինի ազգային հավաքականների մակարդակի հանդիպման ընթացքում գործի մեջ տեսնել այն ֆուտբոլիստներին, որոնք մինչեւ օրս շատ խաղաժամանակ չեն ստացել հավաքականում»,- մարզիչի խոսքը մեջբերում է ՀՖՖ կայքը:
Հիշեցնենք, որ Հայաստանի եւ Ուզբեկստանի հավաքականների միջեւ ընկերական հանդիպումը տեղի կունենա փետրվարի 12-ին՝ ժամը 18:00-ին, Թուրքիայի Անթալիա քաղաքում: Հայաստանի եւ Ուզբեկստանի հավաքականները նախորդ անգամ հանդիպել են 2010 թվականի մայիսի 25-ին: Երեւանում կայացած ընկերական խաղում դաշտի տերերը հաղթել են 3:1 հաշվով: Դուբլի հեղինակ էր դարձել Էդգար Մանուչարյանը , մեկ անգամ էլ աչքի էր ընկել Հենրիխ Մխիթարյանը: Ազգային թիմերն ընկերական խաղ անցկացրել են նաեւ 2001 թվականի փետրվարի 12-ին, երբ Հայաստանի հավաքականը հաղթել է 2:0 հաշվով:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.