Չեռնոգորիայի թիմի դեմ աշխարհի առաջնության ընտրական փուլի չորրորդ տուրի խաղում Հայաստանի ազգային հավաքականի գլխավոր մարզիչի պաշտոնում նորամուտը հաղթանակով նշած Արթուր Պետրոսյանը հետխաղյա ասուլիսում պատասխանեց լրագրողների հարցերին: Երեւանի «Հանրապետական» ստադիոնում կայացած խաղում Չեռնոգորիայի հավաքականն առաջին խաղակեսից հետո ուներ 2 գոլի առավելություն, բայց պարտվեց 2:3 հաշվով:
Շնորհավորում ենք Ձեզ առաջին հաղթանակի առթիվ: 0:2 հաշվի ժամանակ ի՞նչ էիք մտածում:
Ես հավատում էի, նույն էլ՝ տղաները: Առաջին խաղակեսից հետո նրանք գլխիկոր վերադարձան հանդերձարան, բայց մենք ասացինք, որ ոչինչ կորած չէ եւ պետք է հավատանք հաջողությանը: Փառք տղաներին, որ ամեն ինչ արեցին, որ ուրախություն պարգեւեն մեր ժողովրդին:
Ըստ Ձեզ՝ հավաքականը վերադարձա՞վ ընտրական փուլի մրցապայքար:
Մենք ծայրահեղությունից ծայրահեղություն ժողովուրդ ենք: Իմ առաջին ասուլիսում ինձ հարցրեցին, թե որ դեպքում հրաժարական կտամ, իսկ այսօր խոսում ենք աշխարհի առաջնության ուղեգիր նվաճելու մասին: Իահրկե, պետք է համեստ մնալ եւ քայլ առ քայլ առաջ գնալ: Ես դա կրկնում եմ առաջին օրվանից:
Ընդմիջմանն ի՞նչ ասացիք տղաներին:
Հանդերձարանում շատ հանգիստ մթնոլորտ էր, տղաներին բացատրեցինք, թե ինչը կարելի է ուղղել: Ոչ մի աղմուկ ու գոռացող մարզիչ չկար: Որոշ տակտիկական ուղղումներ արեցինք, բայց տեսաք, որ գոլերը տակտիկական կազմակերպվածության հետ ոչ մի կապ չունեին: Ստացվում է, ֆուտբոլ է: Փառք ու պատիվ մեր տղաներին, նրանք հերոսություն արեցին այսօր:
Կգնահատե՞ք խաղը:
Չհաշված 10 րոպեները, մյուս 80 րոպեներից գոհ եմ տղաների կատարած աշխատանքից: Մինչեւ 35-րդ րոպեին քիչ շանսեր տվեցինք մրցակցին: Կարծում եմ, որ այդ 0:2 հաշիվն ավելի ուժ տվեց մեզ, որպեսզի տղաներն ավելի անկաշկանդ հանդես գային երկրորդ խաղակեսում, քանի որ կորցնելու բան արդեն չկար: Կարծում եմ՝ հենց դա որոշիչ դեր ունեցավ, որովհետեւ 3 պարտություններից հետո բարոյահոգեբանական մթնոլորտը շատ լավ էր, բայց կաշկանդվածություն նկատվում էր:
Խաղից հետո ի՞նչ էր կատարվում թիմի հանդերձարանում:
Ես այդ պահին հանդերձարանում չէի եւ չգիտեմ: Այդ պահն ինձ համար շատ զգացմունքային էր եւ ցանկանում էի առանձին լինել: Բայց հետո մտա հանդերձարան եւ շնորհավորեցի մեր հերոսներին: Շատ ուրախ մթնոլորտ էր տիրում:
Ինչպե՞ս հաջողեց կարճ ժամանակահատվածում կերպարանափոխել թիմի խաղը:
Ոչ թե ես արեցի, այ՝ մենք: Մեր մարզչական շտաբով ամեն բան արեցինք տղաներին լավ պատրաստելու համար: Երեկ մի քանի վերնագիր կարդացի, որ թիմը ժպտում է, մարզվում է հումորների ներքո: Փորձեցինք այդ թեթեւ մթնոլորտը բերել թիմ, որպեսզի նրանք այդ կաշկանդվածությունը չզգային: Սա թիմային աշխատանք է, սա Արթուր Պետրոսյանի հաղթանակը չէ: Նույնը կարող եմ ասել ձեր՝ լրագրողների մասին: Դուք եւս լավ մթնոլորտ ստեղծեցիք հավաքականի շուրջ, ինչի համար շնորհակալ եմ ձեզ: Ոչ միայն դուք, այլեւ շատ մարդիկ, այդ թվում՝ ֆեդերացիայի աշխատակիցներն ու նախագահն ամեն ինչ արեցին, որ մենք հաջողության հասնենք: Շնորհակալություն:
Մխիթարյանի դիրքը փոխվեց խաղի ընթացքում, դա տակտիկակա՞ն քայլ էր:
Մարկոսը հոգնել էր, եւ Հենրիխին բերեցինք կենտրոն, որպեսզի նա ավելի շատ ազատություն ստանա եւ կարողանա կազմակերպել մեր գրոհները: Ձախ կիսապաշտպանի դիրքում Մխիթարյանը նաեւ շատ պաշտպանողական աշխատանք կատարեց:
Հնարավո՞ր է, որ հաջորդ խաղից առաջ Արթուր Ալեքսյանյանի պես այլ հայտնի մարզիկ հյուրընկալվի թիմին: Օրինակ՝ Արթուր Աբրահամը:
Ամեն բան հնարավոր է:
Գուցե այս հաղթանակը գյումրեցու թասի՞բ էր:
Ոչ, սա հայի թասիբ էր: Չեռնոգորիան բոլոր ուղիները փակել էր դեպի դարպասը, բայց մենք հաջողության հասանք:
Որոշ դվագներում Արսեն Բեգլարյանը ռիսկի էր դիմում: Հավաքականում այդ ռիսկն արդարացվա՞ծ է:
Դարպասապահի համար նա շատ երիտասարդ տարիքում է: Կարծում եմ՝ դա փորձի պակաս է: Նրա հետ կզրուցենք: Դա փորձի պակասն է, որը կլրացվի:
Հավաքականում հաջորդ քայլերը որո՞նք են լինելու: Ո՞ր դիրքերն են բարելավվելու:
Կարելի է ասել, որ բոլոր դիրքերն էլ պետք է բարելավվեն: Տեսաք, որ երկրորդ խաղակեսում կերպարանափոխվեցինք: Մեծ աշխատանք ունենք կատարելու: Պետք է քայլ առ քայլ առաջ շարժվել:
Արտակ Գրիգորյանի մասին ի՞նչ կասեք:
Եթե նույնիսկ Արտակը սխալներ է թույլ տալիս, նա իր աշխատանքով փակում է ամեն բան: Գոլի դրվագում նա ամեն ինչ հիանալի արեց:
Մինչեւ այս լրագրողների հետ լարված հարաբերություններ կային: Չե՞ք կարծում, որ լրագրողների հետ պետք է մեկ բռունց լինել:
Մենք ձեր կարիքն ունենք, եւ դուք էլ եք օգնել ստեղծել լավ մթնոլորտ: Ես պատրաստ եմ աշխատանքի: Քննադատությունն ընդունելի է ինձ համար:
Մխիթարյանի խաղն ինչպե՞ս կգնահատեք:
Մի քիչ զգացվեց խաղային պրակտիկայի բացակայությունը: Սակայն, եթե Հենրիխը խաղադաշտում է, դա արդեն ուժ է տալիս մեզ: Նա շատ կարեւոր է մեր թիմի համար:
Դավիթ Եղիազարյան
Լուսանկարն՝ Արսեն Սարգսյանի
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։