Արգենտինայի հավաքականի նորանշանակ մարզիչը մտադիր չէ համոզել Մեսիին
13:21 2 օգոստոսի, 2016Պետք չէ ինչ-որ բան համոզել Մեսիին, պարզապես հարկավոր է խոսել ֆուտբոլից, հայտարարել է ֆուտբոլի Արգենտինայի հավաքականի նորանշանակ գլխավոր մարզիչ Էդգարդո Բաուսան: Արգենտինացի մասնագետը մտադիր է առաջիկայում հանդիպել «Բարսելոնայի» հարձակվող Լիոնել Մեսիին, որն ԱՄՆ-ում կայացած Ամերիկայի գավաթի խաղարկության եզրափակիչում հետխաղյա 11 մետրանոցներով Չիլիին պարտվելուց հետո հայտարարել էր ազգային թիմից հեռանալու մասին:
«Մենք կապ չենք հաստատել ոչ Մեսիի, ոչ էլ նրա ընտանիքի անդամներից որեւէ մեկի հետ: Ես ծրագրել եմ հանդիպել Մեսիին ու զրուցել նրա հետ: Պետք չէ ինչ-որ բան համոզել նրան, պարզապես հարկավոր է խոսել ֆուտբոլից: Նրանք, ովքեր եղել են ֆուտբոլիստ, հասկանում են եզրափակիչում կրած պարտության հիասթափությունը: Պետք է պատմել նրան, թե ինչպես ենք պատրաստվում աշխատել: Մեսին հստակ հասկանում է, թե ինչ պետք է անի խաղադաշտում եւ ինչ որոշումներ պետք է ընդունի»,- մարզիչի խոսքը մեջբերում է Ole-ն:
Հիշեցնենք, որ նախորդ 8 ամիսներին Էդգարդո Բաուսան գլխավորում էր բրազիլական «Սան Պաուլուն»: Մարզչական կարիերայում 58-ամյա մարզիչի գլխավոր նվաճումները Լիբերտադորեսի գավաթի խաղարկությունում տարած 2 հաղթանակներն են: 2008-ին նա տիտղոս է նվաճել էկվադորական «ԼԴՈՒ Կիտոյի» հետ, իսկ 2012-ին՝ արգենտինական «Սան Լորենսոյի»: Արգենտինայի հավաքականի գլխավոր մարզիչի պաշտոնում Բաուսան փոխարինել է Խերարդո Մարտինոյին:
29-ամյա Մեսին Արգենտինայի հավաքականում խաղում է 2005-ից եւ անցկացրել է 113 հանդիպում: Վերջերս նա գերազանցեց Գաբրիել Բատիստուտայի ռեկորդը եւ 55 գոլով դարձավ Արգենտինայի հավաքականի պատմության լավագույն ռմբարկուն:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.