Անտոնիո Կոնտե. Իտալիան չունի այնպիսի հրաշալի սերունդ, ինչպիսին ունեն Գերմանիան կամ Իսպանիան
09:52 3 հուլիսի, 2016Ֆուտբոլի Իտալիայի ազգային հավաքականի արդեն նախկին գլխավոր մարզիչ Անտոնիո Կոնտեն Գերմանիայի դեմ Եվրո-2016-ի քառորդ եզրափակիչի խաղում պարտություն կրելուց հետո ամփոփել է իր աշխատանքը ազգային հավաքականում:
«Շատ ծանր էր աշխատանքն ազգային թիմում: Երբեմն տպավարություն էր, որ ամբողջ Իտալիան է իմ դեմ: Միայն Իտալիայի ֆուտբոլի ֆեդերացիայի նախագահն էր ինձ աջակցում: Լրագրողները մշտապես քննադատում էին: Հույս ունեմ՝ իմ աշխատանքով բոլորին ապացուցեցի, որ քննադատողները սխալ էին:
Այս մրցաշարում Իտալիայի հաջողության միակ շանսը ծանրագույն աշխատանքն էր՝ գործարանային աշխատանք: Չեմ ասում, որ մեր ֆուտբոլիստները տաղանդավոր չեն, բայց պետք է նայել ճշմարտության աչքերին եւ ընդունել, որ Իտալիան այժմ չունի այնպիսի հրաշալի սերունդ, ինչպիսին ունեն Գերմանիան կամ Իսպանիան: Բայց տղաները կարողանում են աշխատել եւ ունեն իրենց տեղը ֆուտբոլի աշխարհում: Էլ չեմ ասում, թե ինչքան շատ են սիրում իրենց հավաքականը:
Դեռ Եվրո-2016-ից առաջ որոշել էի հեռանալ ազգային հավաքականից, թեեւ Ֆրանսիայում հաճախ էր ինձ այցելում մնալու մասին միտքը: Բայց դա հնարավոր չէ: Այժմ իմ աշխատանքը «Չելսին» է: Կցանկանայի նոր աշխատանքից առաջ ոչ մի հանգստյան օր չունենալ՝ Իտալիան հասներ եզրափակիչ: Իսկ հիմա կունենամ մեկ շաբաթ արձակուրդ եւ կսկսվի աշխատանքս Անգլիայի Պրեմյեր լիգայում»,- Կոնտեի խոսքը մեջբերում է ՈւԵՖԱ-ի կայքը:
Հիշեցնենք, որ Գերմանիա - Իտալիա հանդիպման հիմնական եւ լրացուցիչ ժամանակն ավարտվել է 1:1 հաշվով, հետխաղյա 11 մետրանոցներով աշխարհի չեմպիոն Գերմանիան հաղթել է 6:5 հաշվով:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.