Միհրան Հարությունյանն արծաթե մեդալ նվաճեց Բաքվում (ֆոտո)
18:30 14 հունիսի, 2015Միհրան Հարությունյանի պատվին Ադրբեջանի մայրաքաղաք Բաքվում կբարձրացվի Հայաստանի դրոշը: Հայաստանը ներկայացնող մարզիկն արծաթե մեդալակիր դարձավ Բաքվում ընթացող Եվրոպական մարզական խաղերի հունահռոմեական ոճի ըմբշամարտի մրցաշարում:
66 կգ քաշային կարգի եզրափակիչում 26-ամյա Հարությունյանը 0:2 հաշվով պարտվեց ռուս Արտյոմ Սուրկովին: Առաջին մրցափուլն ավարտվեց 0:0 հաշվով, իսկ երկրորդում ռուս 21-ամյա ըմբիշը վաստակեց 2 հաղթական միավոր:
Եզրափակիչի ճանապարհին հայ ըմբիշը կիսաեզրափակիչում 8:5 հաշվով հաղթել էր ադրբեջանցի Հասան Ալիեւին, 6:0 հաշվով պարտության էր մատնել իսպանացի Սանչես Նավարոյին, 1 րոպե 17 վայրկյանում 8:0 հաշվով առավելության էր հասել բուլղարացի Կոնստանտին Ստասի նկատմամբ եւ 3 րոպե 8 վայրկյանում 9:1 հաշվով ուժեղ էր գտնվել սերբ Ալեքսանդր Մաքսիմովիչից:
Նշենք, որ Եվրոպական խաղերի պաշտոնական կայքի Youtube-ի ալիքը հեռարձակել էր հունահռոմեական ոճի ըմբշամարտի մրցաշարի գոտեմարտերը, սակայն չցուցադրեց 66 կգ քաշային կարգի մեդալային հանդիպումներն ու Միհրան Հարությունյանի մասնակցությամբ եզրափակիչը: Սա Հայաստանի առաջին մեդալն էր Բաքվում:
Հունիսի 14-ին պայքարի մեջ էին մտել նաեւ 75 կգ քաշային Կարապետ Չալյանը եւ 85 կգ քաշային Մաքսիմ Մանուկյանը: Չալյանը անհաջող էր մեկնարկել՝ 1/16 եզրափակիչում 1 րոպե 55 վայրկյանում 0:8 հաշվով պարտվելով դանիացի Մարկ Մադսենին եւ դուրս մնալով պայքարից: Մաքսիմ Մանուկյանը չեխ Արտուր Օմարովի, ադրբեջանցի Սաման Տահմասեբիի եւ լիտվացի Ալեքսանդր Կազակեւիչի նկատմամբ հաղթանակներից հետո կիսաեզրափակիչում պարտվել էր Ուկրաինան ներկայացնող Ժան Բելենյուկին եւ թուրք ըմբիշի հետ կգոտեմարտի բրոնզե մեդալի համար:
Հիշեցնենք, որ Եվրոպական խաղերի առաջին մրցումային օրը հանդես էր եկել նաեւ հունահռոմեական ոճի ըմբիշ Ռոման Ամոյանը, ով պարտվել էր 59 կգ քաշային կարգի բրոնզե մեդալի համար գոտեմարտում:
Հունահռոմեական ոճի ըմբշամարտի Հայաստանի հավաքականը Բաքու էր մեկնել 4 ըմբիշներով: Եվրոպական խաղերի ազատ ոճի ըմբշամարտի մրցաշարը կմեկնարկի հունիսի 17-ին: Այդ ոճում Հայաստանն ունի 6 ներկայացուցիչ՝ Գարիկ Բարսեղյան (57կգ), Վոլոդյա Ֆրանգուլյան (61կգ), Դավիթ Սաֆարյան (65կգ), Գրիգոր Գրիգորյան (74կգ), Մուսա Մուրթազալիեւ (86կգ) եւ Լեւան Բերիանիձե (125կգ):
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.