Բեռնար Շալանդ. Այդքան հիմար չեմ, որ հենց այնպես փոխարինեմ Մխիթարյանին

Մխիթարյանը վնասվածք էր ստացել դարպասապահի հետ բախման պատճառով: Նա փոխարինում պահանջեց: Այսօր շատ լավ հանդես եկանք մի թիմի դեմ, որը խաղում է տիկի տակա:

Այս մասին Դանիա – Հայաստան (2:1) Եվրո-2016-ի ընտրական խաղից հետո ասաց ֆուտբոլի Հայաստանի հավաքականի գլխավոր մարզիչ Բեռնար Շալանդը, ով խոսեց պարտության պատճառների մասին:

«Այսօր շատ լավ հանդես եկանք մի թիմի դեմ, որը խաղում է տիկի տակա: Մենք շատ կոմպակտ էինք խաղում նրանց դեմ: Մոտ մեկ ժամ մեր խաղը ստացվում էր: Առանց Մխիթարյանի խաղը փոխվեց: Մինչեւ դանիացիների առաջին գոլը մենք ունեինք մեծ հնարավորություններ: Մենք այս խաղում առանց առանցքային ֆուտբոլիստների էինք խաղում: Շնորհավորում եմ իմ թիմին ու դանիացիներին, մենք մեծ գործ կատարեցինք: Ֆիզիկական պատրաստվածության խնդիրներ չունեինք:

Հենրիխ Մխիթարյանը վնասվածք ստացավ եւ ինքը խնդրեց փոփարինում: Ես այդքան հիմար չեմ, որ հենց այնպես փոխարինեմ նրան: Դեռ պարզ չէ նրա վնասվածքի լրջությունը: Հենրիխը բախվեց դարպասապահի հետ: Կարծում եմ՝ վնասվածքը լուրջ չէ:

Դանիացիների երկու փոփոխությունները լավ աշխատեցին: Կարծում եմ՝ մեր խնդիրն ավելի շատ գնդակը կորցնելու մեջ է: Երբ մրցակիցն անընդհատ հարձակվում է եւ դու կորցնում ես գնդակը, ապա մեկ անգամ նա հաստատ կհաջողացնի գոլ խփել»,- նշեց Շալանդը:

Հիշեցնենք, որ Կոպենհագենի «Պարկեն» ստադիոնում կայացած խաղում Հայաստանի հավաքականը Հենրիխ Մխիթարյանի գոլի շնորհիվ երկրորդ խաղակեսում բացեց հաշիվը, սակայն այնուհետեւ բաց թողեց 2 գոլ: Դա շվեյցարացի մասնագետ Բեռնար Շալանդի առաջին պաշտոնական խաղն էր Հայաստանի հավաքականի գլխավոր մարզիչի պաշտոնում:

Վերա Մարտիրոսյան՝ Կոպենհագենից