Արթուր Սարկիսով. Գերմանիան արժանի է չեմպիոնությանը

Հայաստանի հավաքականի եւ Նիժնի Նովգորոդի «Վոլգայի» հարձակվող Արթուր Սարկիսովը NEWS.am Sport-ի թղթակցի հետ զրույցում անդրադարձել է Բրազիլիայում շարունակվող ֆուտբոլի աշխարհի առաջնությանը:

«Այսօրվա խաղում նախապատվությունս Գերմանիայի կողմն է: Կարծում եմ՝ նրանք ավելի արժանի են հաղթանակի: Վաղը երկրպագելու եմ Հոլանդիային, բայց կարծում եմ՝ կհաղթի Արգենտինան: Առաջնությունը շատ լավն է՝ դիտարժան ու հետաքրքիր: Կոստա Ռիկայի կարգի թիմերը շատ ուրախացրին: Ես նախապատվություն չունեի այս առաջնությունում: Պարզապես կարծում եմ, որ ամենալավը պատրաստված են գերմանացիները, ովքեր արժանի են դառնալ չեմպիոն»,- զրույցում հայտնեց Սարկիսովը:

Հիշեցնենք, որ օրեր առաջ ծնվել էր 27-ամյա Արթուր Սարկիսովի երկրորդ որդին, ում անվանակոչել էին Ռոման:

Վերա Մարտիրոսյան