Սուարեսը որակազրկվեց 9 խաղով եւ այլեւս չի խաղա ԱԱ-2014-ում
18:11 26 հունիսի, 2014Ուրուգվայի հավաքականի հարձակվող Լուիս Սուարեսը որակազրկվեց 9 խաղով, ինչպես նաեւ 4 ամսով հեռացվել է ֆուտբոլից եւ այդ ընթացքում չի մասնակցի ոչ մի մրցաշարի, հայտնում է ԱԱ-2014-ի թվիթերյան էջը:
Անգլիական «Լիվերպուլի» ֆուտբոլիստը պատժվեց ԱԱ-2014-ի երրորդ տուրի խաղում Թուրինի «Յուվենտուսի» իտալացի պաշտպան Ջորջո Կյելինիի ուսը կծելու համար:
9-խաղյա որակազրկումը վերաբերում է միայն ազգային թիմերի խաղերին եւ ուժի մեջ կմտնի Բրազիլիայում ընթացող ֆուտբոլի աշխարհի առաջնության փլեյ-օֆֆի ուղեգիր նվաճած Ուրուգվայի հավաքականի առաջիկա հանդիպումից, ինչը նշանակում է, որ Սուարեսը 1/8 եզրափակիչում չի խաղա կոլումբացիների դեմ՝ բաց թողնելով մրցաշարի մնացած հատվածը: Բացի այդ, ուրուգվայցին կվճարի 100 հազար շվեյցարական ֆրանկ տուգանք:
Սուարեսը 4 ամսով հեռացվել է ֆուտբոլից. նա նույնիսկ չի կարող մարզվել թիմի հետ եւ գտնվել ստադիոնում: Ուրուգվայի ֆուտբոլի ֆեդերացիան կարող է բողոքարկել ՖԻՖԱ-ի որոշումը, սակայն դա հարձակվողին թույլ չի տա խաղալ կոլումբացիների դեմ:
Հիշեցնենք, որ Լուիս Սուարեսը նման վարքով աչքի էր ընկել նաեւ 2013-ին կայացած Լոնդոնի «Չելսիի» դեմ Անգլիայի առաջնության խաղում՝ կծելով սերբ պաշտպան Բրանիսլավ Իվանովիչին: Այդ միջադեպի պատճառով նա որակազրկվել էր Պրեմյեր լիգայի 10 խաղով:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.