Սոչի-2014. Սերգեյ Միքայելյան. Նպատակս լավագույն 30-յակում ընդգրկվելն էր
17:18 9 փետրվարի, 2014Օլիմպիական խաղերում 40-50-ի մեջ հայտնվելն այնքան էլ վատ չէ: Ճիշտ է, ես ունեի ավելի լավ հնարավորություններ եւ լավագույն 30-յակում ընդգրկելու նպատակ, բայց ուժերս բավականացրեցին միայն 46-րդ տեղի համար:
Այս մասին NEWS.am Sport-ի թղթակցի հետ զրույցում ասաց Սոչիում ընթացող 22-րդ ձմեռային օլիմպիական խաղերի դահուկավազքի սկիատլոնի մրցաշարում (30 կմ) 46-րդ տեղը զբաղեցրած Սերգեյ Միքայելյանը: 21-ամյա մարզիկի հետ հաջողվեց զրուցել մրցման ավարտից անմիջապես հետո:
Սերգեյ, դու 46-րդն ես: Ինչպե՞ս կգնահատես այս արդյունքը:
Զգացողություններս դեռ անհասկանալի են, հենց նոր ավարտեցի մրցումը: Կարծում եմ՝ 46-րդը տեղը վատ արդյունք չէ: Իհարկե, ինքս ինձանից սպասելիքներ ունեի, որ ավելի լավ արդյունք կունենամ: Նպատակս էր մտել լավագույն 30-յակ, այդպես ավելի լավ կլիներ: Ինձ համար վատ արդյունք չէ, նորմալ է: 40-50-ի մեջ հայտնելը բավարար արդյունք է: Պարզապես ես ավելիին հասնելու հնարավորություններ ունեի: Բայց իրականում շատ բարդ էր: Վատ չէ: Վատ կլիներ, եթե 50-յակում էլ չընդգրկվեի:
Բա՞րդ պայքար էր:
Բավական, քանի որ սպասարկող անձնակազմը բացակայում էր: 30 կիլոմետրը շատ բարդ մրցատարածություն է, հարկավոր է սնվել այս տարածությունը հաղթահարելիս, հատուկ հեղուկներ ընդունել եւ դրա համար պետք են հատուկ մարդիկ՝ կանգնած հատուկ տեղերում: Ցավոք, այդ հարցում պակասություն կար: Բացի այդ, ես ունեի նաեւ դահուկների հետ կապված խնդիր: Նախքան մրցումը հարկավոր էր մեկ անգամ ստուգել դահուկները եւ ճիշտ քսուք օգտագործել մրցումներից առաջ: Դրա պատճառը կրկին սպասարկող անձնակազմի բացակայությունն էր:
Մրցուղիների մասին ի՞նչ կասես:
Իհարկե, սա Օլիմպիական խաղերն է եւ այստեղ ոչինչ հեշտ չէ: Ամենաբարդ մրցուղիներն Օիմպիական խաղերում են: Սա էլ ամենաբարդ մրցուղին էր:
Մեկնարկից առաջ հուզմունք կա՞ր:
Մեկնարկից առաջ կար, բայց մեկնարկից հետո ամբողջ հուզմունքն անցավ:
Այժմ ի՞նչ զգացողություններ ունես: Րոպեներ չեն անցել այդքան երկար սպասված Օլիմպիական խաղերում առաջին մրցելույթիցդ:
Այս պահին ոչինչ չեմ զգում, քանի որ անտանելի մրսում եմ, ամբողջովին քրտնած ու հոգնած եմ: Ցանկանում եմ գնալ համազգեստս փոխել, քնել եւ հանգստանալ: Հետո նոր կամփոփեմ այն, ինչ տեղի ունեցավ այսօր:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.