Տոկիո-2020. Օգոստոսի 3-ին Հայաստանը կունենա 6 մասնակից
19:50 2 օգոստոսի, 2021Տոկիոյի Օլիմպիական խաղերում Հայաստանն օգոստոսի 3-ին կունենա 6 մասնակից աթլետիկայում, բռնցքամարտում, ըմբշամարտում եւ ծանրամարտում։
Հունահռոմեական ոճի ըմբշամարտի մրցաշարում օգոստոսի 3-ին Հայաստանի ներկայացուցիչներից առաջինը մրցագորգ դուրս կգա 67 կգ քաշային Կարեն Ասլանյանը։
Եվրոպայի առաջնության բրոնզե մեդալակիրը (2018, 2019, 2020) պայքարը կսկսի 1/8 եզրափակիչից։ 26-ամյա ըմբիշը կմրցի 2016թ. աշխարհի ու 2017թ. Եվրոպայի չեմպիոն, 34-ամյա հունգարացի Բալինտ Կորպաշիի հետ: Հաղթողը քառորդ եզրափակիչում կարող է հանդիպել աշխարհի կրկնակի չեմպիոն, 33-ամյա կորեացի Ռյու Սան Սուի հետ, որը պայքարը կսկսի որակավորման փուլից:
67 կգ քաշային կարգի գոտեմարտերը կմեկնարկեն Երևանի ժամանակով 06:30-ին:
77 կգ քաշային կարգում բրոնզե մեդալի համար կգոտեմարտի Կարապետ Չալյանը, որի մրցակիցը կլինի ադրբեջանցի Ռաֆիգ Հուսեյնովի ու թունիսցի Լամջեդ Մաաֆիի միջև սփոփիչ գոտեմարտի հաղթողը:
97 կգ քաշային կարգի եզրափակիչում 2016թ. օլիմպիական չեմպիոն Արթուր Ալեքսանյանը կգոտեմարտի աշխարհի ու Եվրոպայի կրկնակի չեմպիոն, 28-ամյա ռուսաստանցի Մուսա Եվլոևի հետ:
Կիսաեզրափակիչները, բրոնզե մեդալի համար գոտեմարտերն ու եզրափակիչները կմեկնարկեն Երեւանի ժամանակով 13։15-ին։ Եզրափակիչը նախնական՝ 15։15–ին։
Բռնցքամարտի մրցաշարում Հայաստանի վերջին ներկայացուցիչ Հովհաննես Բաչկովը 63 կգ քաշային կարգի քառորդ եզրափակիչում կմենամարտի Ուզբեկստանի ներկայացուցիչ, 2017թ․ Ասիայի չեմպիոն, 2015թ․ աշխարհի առաջնության բրոնզե մեդալակիր, ԱՄՆ-ում բնակվող Էլնուր Աբդուրաիմովի հետ, որը 1/8 եզրափակիչում 5։0 հաշվով հաղթել է տաջիկ Բախոդուր Ուսմոնովին։
Մենամարտը կմեկնարկի Երեւանի ժամանակով 07։03–ին։ Հաղթանակի դեպքում Հավհաննես Բաչկովը կապահովի առնվազն բրոնզե մեդալ։
Աթլետիկայի մրցաշարում Հայաստանի միակ ներկայացուցիչ Լեւոն Աղասյանը օգոստոսի 3–ին կմասնակցի եռացատկի նախնական փուլին։ Նա Բ խմբի 16 մասնակիցներից կմեկնարկի 9–րդը։ Եվս 16 եռացատկորդ ընդգրկված կլինի Ա խմբում։
Եզրափակիչ դուրս կգան 17,05 մետր արդյունք ցույց տված մարզիկները կամ 12 լավագույները։ Լեւոն Աղասյանի անձնական ռեկորդը 17,16 մետր է, սահմանել է այս տարի։
Եռացատկի նախնական փուլը տեղի կունենա Երեւանի ժամանակով 04:00-07:35-ը:
Օգոստոսի 3–ին մրցահարթակ դուրս կգա ծանրամարտի տղամարդկանց մրցաշարում Հայաստանի միակ ներկայացուցիչ Սիմոն Մարտիրոսյանը։
109 կգ քաշայինների Ա խմբի մրցումը կսկսվի Երեւանի ժամանակով 14։50-ին։
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.