Վասիլի Ուտկին. Ադրբեջանի համար դեռ վաղ է մասնակցել համաեվրոպական սպորտային միջոցառումների

18:08   12 հունիսի, 2021

Ռուս հայտնի մեկնաբան Վասիլի Ուտկինն անդրադարձել է ռուսական «Матч ТВ» հեռուստաալիքի աշխատակից Միխայիլ Մոսակովսկու շուրջ ստեղծված իրավիճակին: Եվրո-2020-ի հավատարմագրում ունեցող ռուս մեկնաբան Միխայիլ Մոսակովսկուն նախօրեին Բաքվի օդանավակայանում թույլ չէին տվել հատել Ադրբեջանի սահմանը և նույն ինքնաթիռով հետ էին ուղարկել Մոսկվա։ Նա պետք է լուսաբաներ հունիսի 12-ին Բաքվում նախատեսված Ուելս - Շվեյցարիա Եվրո-2020-ի առաջին տուրի հանդիպումը։ Մեկնաբանը մի քանի տարի առաջ այցելել է Արցախի Հանրապետություն, իսկ անցած տարի եղել է Հայաստանում։

«Ընդհանուր առմամբ, հասկանալի է, որ, ավաղ, Ադրբեջանի համար դեռ վաղ է մասնակցել համաեվրոպական սպորտային միջոցառումներին: Դա ՈւԵՖԱ-ի մեծագույն սխալն է: Միանգամից 2 միջադեպ Նոբելի ու Մոսակովսկու վերաբերյալ: Պետք է հասունանալ: Իսկ հիմա դեռ վաղ է»,- գրել է Ուտկինը Տելեգրամում։

Հիշեցնենք, որ ավելի վաղ Բաքվի կազմկոմիտեի մերժման պատճառով Եվրո-2020-ի հավատարմագրում չէր ստացել «Матч ТВ»-ի մեկնաբան Նոբել Առուստամյանը, սակայն Ռուսաստանի ԱԳՆ-ի միջամտությամբ խնդիրը լուծվել էր։ Իսկ «Матч ТВ»-ի մեկ այլ մեկնաբան Կոնստանտին Գենիչը չի ստացել Եվրո-2020-ի լուսաբանման հավատարմագրումը Բաքվի կազմկոմիտեի մերժման հետևանքով։ Նա նույնպես 2009 թվականին այցելել է Արցախի Հանրապետություն։



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։