Ֆլոյդ Մեյվեզեր. Պոլը զարմացրեց ինձ, այս մենամարտը կարող է լինել վերջինը

Պրոֆեսիոնալ բռնցքամարտի հինգ քաշային կարգերում աշխարհի նախկին չեմպիոն, անպարտելի Ֆլոյդ Մեյվեզերը 26-ամյա վիդեոբլոգեր Լոգան Պոլի հետ ցուցադրական մենամարտից հետո չի բացառել, որ դա իր վերջին ելույթն էր:

«Ես հեռացել եմ բռնցքամարտից: Հնարավոր է, որ ցուցադրական մենամարտեր այլևս չեն լինի: Ես արդեն 21 տարեկան չեմ, բայց լավ է, որ կարողանում եմ այդպես շարժվել այսպիսի երիտասարդ մրցակցի դեմ պայքարում: Պոլը հրաշալի երիտասարդ մարտիկ է, ուժեղ և կոշտ: Նա ավելի լավն է, քան ես սպասում էի: Պոլը զարմացրեց ինձ: Հուսով եմ՝ երկրպագուները վայելեցին այս մենամարտը»,- ամերիկացու խոսքը մեջբերում է The Athletic-ը:

Հիշեցնենք, որ Մայամիի «Հարդ Ռոկ սթեդիումում» տեղի ունեցած 8 ռաունդանոց մենամարտը հաղթող չէր ունեցել: Քանի որ մենամարտն ուներ ոչ պաշտոնական բնույթ, չկային ռինգից դուրս գտնվող մրցավարներ: Այդ պատճառով մասնակիցները կարող էին հաղթանակի հասնել միայն մրցակցին նոկաուտի ենթարկելու շնորհիվ:

Մենամարտի արդյունքը չի ընդգրկվի պաշտոնական վիճակագրության մեջ: 44-ամյա Ֆլոյդ Մեյվեզերը պրոֆեսիոնալ ռինգում անցկացրած 50 մենամարտերում տարել է 50 հաղթանակ: Լոգան Պոլը պարտություն է կրել միակ մենամարտում:

Նախորդ անգամ Ֆլոյդ Մեյվեզերը ռինգից առանց հաղթանակի հեռացել էր 1996թ. Օլիմպիական խաղերում, որտեղ միավորներով պարտվել էր բուլղարացի Սերաֆիմ Տոդորովին:

Մեյվեզերը նախորդ մենամարտն անցկացրել է 2018-ի դեկտեմբերի 31-ին Տոկիոյում՝ նոկաուտի ենթարկելով ճապոնացի Տենսին Նասուկավային: