ԵԱ. Տաթև Հակոբյանը 9-րդն է
22:11 10 ապրիլի, 2021Հայաստանի ներկայացուցիչ Տաթև Հակոբյանը (87 կգ) 9-րդ տեղը գրավեց Մոսկվայում ավարտին մոտեցող ծանրամարտի Եվրոպայի առաջնությունում:
Կանանց 89 կգ քաշայինների պայքարում 25-ամյա մարզուհին երկամարտում գրանցեց 221 կգ (101+120) արդյունք: Պոկում վարժությունում Հակոբյանը գրանցեց 7-րդ արդյունքը, իսկ հրումում 9-րդն էր: 2 վարժություններում էլ նա հաջող կատարեց միայն առաջին մոտեցումները: A խմբում Տաթև Հակոբյանը գրավեց վերջին տեղը:
Եվրոպայի չեմպիոնի կոչումը նվաճեց ռուս Դարիա Ախմերովան, որը երկամարտում հավաքեց 246 կգ (108+138): Երկրորդ տեղը զբաղեցրեց մոլդովացի Ելենա Չիլչիչը (245 կգ), իսկ բրոնզե մեդալը բաժին հասավ ռուս Դարիա Ռիազանովային (240 կգ):
Նախորդ՝ Բաթումի-2019 Եվրոպայի առաջնությունում Հակոբյանը փոքր բրոնզե մեդալ էր նվաճել պոկում վարժությունում (105 կգ) ու 230 կգ արդյունքով չորրորդ տեղը գրավել երկամարտում:
Հիշեցնենք, որ Մոսկվայում Հայաստանի ներկայացուցիչներից Եվրոպայի չեմպիոնի կոչումը նվաճել են Կարեն Ավագյանը (89 կգ) և Սամվել Գասպարյանը (102 կգ), Արսեն Մարտիրոսյանը (102 կգ) դարձել է Եվրոպայի փոխչեմպիոն, իսկ Անդրանիկ Կարապետյանը (89 կգ), Հակոբ Մկրտչյանը (96 կգ) և Լիանա Գյուրջյանը (81 կգ) նվաճել են բրոնզե մեդալ: Իզաբելլա Յայլյանը (55 կգ) և Ռաֆիկ Հարությունյանը (81 կգ) գրավել են չորրորդ տեղը, իսկ Դավիթ Հովհաննիսյանը (96 կգ) և օլիմպիական փոխչեմպիոն Սիմոն Մարտիրոսյանը (109 կգ) զրո են ստացել հրում վարժությունում:
14 ծանրորդով մրցավայր մեկնած Հայաստանի հավաքականի կազմում ԵԱ-ի վերջին օրը՝ ապրիլի 11-ին, մրցահարթակ դուրս կգան Արփինե Դալալյանը (+87 կգ), Գոռ Մինասյանը և Վարազդատ Լալայանը (+109 կգ):
Եվրոպայի առաջնությունը վարկանիշային է Տոկիոյի Օլիմպիական խաղերի համար:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.