Լևոն Արոնյանը կոչ է արել չքաղաքականացնել իր գրառումը

Հայկական շախմատի առաջատար Լևոն Արոնյանը կոչ է արել չքաղաքականացնել իր գրառումը: Ավելի վաղ հայ գրոսմայստերը կոչ էր արել մասնակցել Ազատության հրապարակում կայանալիք մոմավառությանը՝ ի հիշատակ հայրենիքի համար անմահացած հերոսների:

«Ի հավելումն նախորդ գրառմանս, ես ուզում եմ նշել, որ ինձ համար քաղաքական դիրքորոշումները ոչ մի կապ չունեն մոմավառության, դրա անցկացման վայրի և կազմակերպիչների հետ: Ես նվիրված եմ իմ ազգին և միշտ շարունակելու եմ լինել՝ անկախ քաղաքական իրադարձություններից: Ես հավատում եմ միայն մեկ ճշմարտության, որ մենք բոլորս ունենք միայն մեկ ազգ ու պիտի համախմբվենք մեկ գաղափարի շուրջ՝ պատվով կերտել մեր ապագան»,- ֆեյսբուքյան էջում գրել է Լևոն Արոնյանը:

Հիշեցնենք, որ նոյեմբերի 12-ին Լևոն Արոնյանը Speed Chess Championship արագ շախմատի առցանց մրցաշարում տարած հաղթանակը նվիրել էր Արցախյան պատերազմի զոհերի հիշատակին՝ նշելով, որ վերջին օրերն ամենացավալին էին իր կյանքում: