Հենրիխ Մխիթարյան․ Լավ եմ զգում ինձ, կարոտել էի խաղը
14:09 2 դեկտեմբերի, 2019Իտալական «Ռոմայի» եւ Հայաստանի հավաքականի կիսապաշտպան Հենրիխ Մխիթարյանը մեկնաբանել է «Վերոնայի» դեմ հանդիպումը Իտալիայի առաջնության 14-րդ տուրում։ Հայ ֆուտբոլիստը վնասվածքից հետո առաջին գոլն է խփել։ «Ռոման» հաղթել է 3։1 հաշվով։
«Շատ ուրախ եմ, որ սկսեցի խաղալ։ Լավ եմ զգում ինձ, կարոտել էի խաղը, երկու ամիսը շատ երկար է։ Ցավալի էր բացակայությունը, բայց հիմա ինձ լավ եմ զգում։ Կարծում եմ՝ շատ կարեւոր էր այս հաղթանակը։ Մենք շատ լավ չխաղացինք, բայց ամենակարեւորը 3 միավորն է։
Ագրեսիվ եւ ծանր խաղ էինք սպասում Վերոնայում, շատ լավ ուսումնասիրել էին մրցակցին եւ արեցինք այն, ինչ պահանջվում էր։
Առաջադիմելու շատ տեղ կա։ Մարզիչն ու շատ խաղացողներ դեռ նոր են, մրցաշրջանը երկար է, մենք պետք է անենք ամեն ինչ, որպեսզի հաղթենք։ Մենք պետք է կատարենք մարզիչի առաջադրանքները։
Մարզիչի եւ թիմակիցներիս շնորհիվ մարտավարական տեսանկյունից հարմարվելու հետ կապված խնդիր չունեցա «Ռոմայում»։ Բոլոր խաղացողների ձգտումները մեկ ուղղությամբ են։ Խաղադաշտում իմ դիրքի հետ կապված խնդիր չի եղել»,- ասել է Մխիթարյանն իտալերեն՝ նշելով, որ դեռ կատարելագործվելու շատ տեղ ունի իտալերենում։
Հիշեցնենք, որ «Վերոնայի» դեմ արտագնա խաղում Մխիթարյանը փոխարինման էր դուրս եկել 67-րդ րոպեին եւ աչքի ընկել ավելացված երկրորդ րոպեին։
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.