ԵԱ-2015. Հայաստանի հավաքականները վստահ հաղթանակներ տարան վերջին տուրում

19:50   22 նոյեմբերի, 2015

Շախմատի Հայաստանի հավաքականը վստահ հաղթանակով ավարտեց Իսլանդիայի մայրաքաղաք Ռեյկյավիկում անցկացվող Եվրոպայի թիմային առաջնությունը: Վերջին՝ 9-րդ տուրում հայ գրոսմայստերները 3:1 հաշվով առավելության հասան Վրաստանի թիմի նկատմամբ:

6-րդ վարկանիշային համարով հանդես եկող Հայաստանի թիմի առաջատար Լեւոն Արոնյանը սպիտակներով հաղթեց Բահադուր Ջոբավային, երրորդ համար Սերգեյ Մովսեսյանը սպիտակներով ուժեղ գտնվեց Լուկա Պաիչաձեից, Գաբրիել Սարգսյանը երկրորդ խաղատախտակի վրա սեւերով ոչ ոքի խաղաց Միխեիլ Մչեդիշվիլու հետ, իսկ Հրանտ Մելքումյանը սեւերով միավորը կիսեց Մերաբ Գագունաշվիլիի հետ: 

Հայաստանի հավաքականն առաջնությունն ավարտեց 13 միավորով եւ այժմ ընթացիկ երկրորդ տեղում է:

Ավելի վաղ Եվրոպայի չեմպիոնի տիտղոսն ապահովել էր Ռուսաստանի հավաքականը, որը վերջին տուրում ոչ ոքի էր խաղացել երկրորդ տեղում գտնվող Հունգարիայի հետ եւ 15 միավորով գրավել առաջին տեղը: Հունգարացիներն ունեն 13 միավոր եւ ընթացիկ երրորդ տեղում են: 11 միավոր ունեցող Ֆրանսիայի հավաքականը մրցում է Հոլանդիայի թիմի հետ եւ 3 պարտիաներից հետո հաղթում է 2:1 հաշվով:

Կանանց Հայաստանի հավաքականը վերջին տուրում 3.5:0.5 հաշվով հաղթեց Չեխիային: Հայկական թիմի առաջատար Էլինա Դանիելյանը, երրորդ ու չորրորդ համարներ Լիլիթ Գալոյանը եւ Մարիա Կուրսովան հաղթանակներ տարան, իսկ Լիլիթ Մկրտչյանը ոչ ոքի խաղաց երկրորդ խաղատախտակի վրա: Կանանց Հայաստանի հավաքականն առաջնությունն ավարտեց 10 միավորով, սակայն մրցանակային տեղերի չի հավակնում: 



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։