Եվրո-2016-ի բոլոր մասնակիցները

01:44   18 նոյեմբերի, 2015

Հայտնի են ֆուտբոլի Եվրոպայի 2016թ. առաջնության եզրափակիչ մրցաշարի բոլոր մասնակիցները: Վերջին 4 հաջողակները դարձան Հունգարիայի, Իռլանդիայի, Ուկրաինայի եւ Շվեդիայի հավաքականները, որոնք ուղեգիր նվաճեցին երրորդ տեղ գրաված 8 թիմերի միջեւ անցկացված անցումային խաղերի արդյունքում:

Մինչեւ այս Եվրո-2016-ի եզրափակիչ փուլում մրցաշարի կազմակերպիչ երկիր Ֆրանսիայի պես իրենց տեղն արդեն ապահովել էին՝ Անգլիան, Չեխիան, Իսլանդիան, Ավստրիան, Պորտուգալիան, Իսպանիան, Շվեյցարիան, Հյուսիսային Իռլանդիան, Ուելսը, Իտալիան, Բելգիան, Ալբանիան, Գերմանիան, Լեհաստանը, Ռումինիան, Ռուսաստանը, Սլովակիան, Խորվաթիան եւ Թուրքիան։ Թուրքերը նման պատվի էին արժանացել ընտրական 9 խմբերում երրորդ տեղ գրաված թիմերի միջեւ լավագույն ցուցանիշն ունենալու շնորհիվ:

1984 թվականից հետո առաջին անգամ Եվրոպայի առաջնությունը կանցնի առանց հոլանդացիների, որոնք չորրորդ տեղն էին գրավել ընտրական A խմբում (Չեխիա, Իսլանդիա, Թուրքիա, Հոլանդիա, Ղազախստան, Լատվիա)։

Եվրո-2016-ն անցկացվելու է 2016-ի հունիսի 10-ից հուլիսի 10-ը եւ պատմության մեջ առաջին անգամ Եվրոպայի չեմպիոնի կոչման համար պայքարելու են 24 հավաքականներ: Եվրոպայի գործող չեմպիոնն Իսպանիայի հավաքականն է: 

Եվրոպայի առաջնության եզրափակիչ մրցաշարի խմբային փուլի վիճակահանությունը տեղի է ունենալու դեկտեմբերի 12-ին Փարիզում: 



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։