Բաշկիրիայի «Ուֆայի» հայկական արմատներ ունեցող 28-ամյա դարպասապահ Դավիդ Յուրչենկոն խոսել է Ռուսաստանի առաջնության 18-րդ տուրում Մոսկվայի «Դինամոյից» կրած պարտության եւ Հայաստանի հավաքականում հանդես գալու հնարավորության մասին:
«Կնշեմ Գաբուլովի հիանալի խաղը: Նա մեծ դերակատարում ունեցավ «Դինամոյի» հաղթանակում: Առաջին գոլն իմ սխալի պատճառով չէր: Մինչեւ մրցակցի կատարած փոխանցումը կենտրոնական գոտում տեսա մեր ֆուտբոլիստին, իսկ հետո գնդակը հետ մղեցի նրա ուղղությամբ: Հետ մղելուց հետո շրջեցի գլուխս՝ տեսնելով, որ այնտեղ 2 մրցակիցներ կային, իսկ թիմակիցս հայտնվել էր կողքիս: Պարզապես անհամաձայնեցված գործողություն էր:
Խնդրել եմ իմ՝ որեւէ ազգային հավաքականում հանդես գալու հարցը հետաձգել մինչեւ ամառ: Հիմա ակումբային գործերն ավելի կարեւոր են, իսկ հետո կզրուցենք Հայաստանի հավաքականի ներկայացուցիչների հետ: Որոշումս առաջին հերթին կապված է լեգեոնականների լիմիտի հետ: Ես ունեմ ռուսական անձնագիր, այդ պատճառով այժմ չեմ համարվում լեգեոնական, սակայն լիմիտը կարող է փոխվել»,- Յուրչենկոյի խոսքը մեջբերում է «Սպորտ Էքսպրեսը»:
Հիշեցնենք, որ Դավիդ Յուրչենկոյի հայկական արմատների մասին հայտն էր դարձել նախորդ տարվա վերջնամասում: Դրանից հետո ռուսաստանցի դարպասապահը հայտնել էր Հայաստանի հավաքականում հանդես գալու ցանկություն:
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։