Եվրոպայի եռակի չեմպիոն Արթուր Ալեքսանյանը դուրս եկավ Ուզբեկստանի մայրաքաղաք Տաշքենդում ավարտին մոտեցող հունահռոմեական ոճի ըմբշամարտի աշխարհի առաջնության եզրափակիչ՝ ապահովելով առնվազն արծաթե մեդալ:
98 կգ քաշային կարգի կիսաեզրափակիչում գյումրեցի ըմբիշը 3:1 հաշվով հաղթեց 2012թ. օլիմպիական չեմպիոն, իրանցի Ղասեմ Ռեզային՝ ռեւանշի հասնելով Լոնդոնի Խաղերում կրած պարտության համար: Արթուր Ալեքսանյանը երկրորդ տարին անընդմեջ դուրս եկավ աշխարհի առաջնության եզրափակիչ, որտեղ կմրցի գերմանացի Օլիվեր Հասլերի հետ:
Նախորդ 3 գոտեմարտերում Ալեքսանյանը պարտության էր մատնել Թուրքմենստանը ներկայացնող Արսլան Սապարմամեդովին, հունգարացի Ադամ Վարգային եւ բելառուս Ալեքսանդր Հրաբովիկին:
Հիշեցնենք, որ աշխարհի առաջնության վերջին օրը Հայաստանի ներկայացուցիչներից պայքարի մեջ էր մտել նաեւ Պեկինի Օլիմպիական խաղերի բրոնզե մեդալակիր Ռոման Ամոյանը, ով 59 կգ քաշայինների 1/16 եզրափակիչում 0:3 հաշվով պարտվել էր ռուսաստանցի Մինգիյան Սեմենովին: Քանի որ ռուսաստանցի ըմբիշը նվաճեց եզրափակիչի ուղեգիր, 2008թ. Պեկինի Օլիմպիական խաղերի բրոնզե մեդալակիր, աշխարհի փոխչեմպիոն, Եվրոպայի չեմպիոն Ռոման Ամոյանը հնարավորություն ստացավ պայքարել բրոնզե մեդալի համար եւ կմասնակցի սփոփիչ գոտեմարտերի: 71 կգ քաշային Վարշամ Բորանյանը դուրս է եկել կիսաեզրափակիչ, որտեղ կհանդիպի թուրք Յունուս Օզելին:
Տաշքենդում մեդալների համար գոտեմարտերը կսկսվեն Երեւանի ժամանակով 17:00-ին:
Շուշանիկ Հակոբյան՝ Տաշքենդից («Դեւինպորտ» ընկերության աջակցությամբ)
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։