«Շախմատային կրթության տեսական եւ գործնական հիմնահարցերը դպրոցում» ծաղկաձորյան միջազգային կոնֆերանսի շրջանակում մեր փորձով կփորձենք միջազգային կրթական ոլորտին օրինակ լինել՝ շախմատը դպրոցներում որպես կրթական առարկա ներառելու համար:
Այս մասին լրագրողների հետ հանդիպմանն ասել է Հայաստանի շախմատի ֆեդերացիայի փոխնախագահ Սմբատ Լպուտյանը:
«Շախմատը դրոցում» ծրագրի շրջանակում Ծաղկաձորում մեկնարկել է երկրորդ միջազգային կոնֆերանսը՝ «Շախմատային կրթության տեսական եւ գործնական հիմնահարցերը դպրոցում» խորագրով: Կոնֆերանսին մասնակցում են 20 երկրների ներկայացուցիչներ:
«Միջազգային այս կոնֆերանսին մասնակցում են 20 երկրների ներկայացուցիչներ, ովքեր դեռ չունեն շախմատը դպրոցներում որպես առարկա եւ ցանկանում են ընդգրկել՝ վերցնելով Հայաստանի օրինակը: Կոնֆերանսի շրջանակում մեր հյուրերին սոցիոլոգների, հոգեբաններին, մասնագետների, մեթոդիստների եւ դասավանդողների միջոցով կներկայացվի շախմատի դերը դպրոցում եւ այն, թե ինչ է տալիս շախմատի ուսուցումը դպրոցականին»,- ասաց Սմբատ Լպուտյանը:
Կոնֆերանսին մասնակցեցին Եվրոպայի շախմատի միության նախագահ Զուրաբ Ազմայպարաշվիլին, Հայաստանի կրթության եւ գիտության նախարար Լեւոն Մկրտչյանը, տարբեր երկրների համալսարանների ռեկտորներ եւ ներկայացուցիչներ:
«Այս դարում տեղեկատվության հոսքը մեր կյանք շատ մեծ է, որովհետեւ աշխարհում կան շատ խնդիրներ: Եվ լուծում, ճիշտ ճանապարհներ մարդիկ չեն գտնում: Գուցե շատերի մոտ հարց առաջանա, թե որքանով կապ ունի շախմատը մեր կյանքի, ներքաղաքական, երկների ու աշխարհում տիրող խնդիրների լուծման հետ: Շախմատիստները հետաքրքիր ունակություններով տեր մարդիկ են, ովքեր կարողանում են ճիշտ գնահատել իրենց հետագա քայլերը: Շախմատը ոչ միայն մարզաձեւ է, այլեւ գիտություն, կյանքի գիտություն: Ես անչափ ուրախ եմ, որ աշխարհի հնագույն երկրներից մեկում ծնունդ առավ շախմատը դպրոցներում դասավանդելու գաղափարը եւ այսօր այդ ծրագիրը հրաշալի օրինակ է տարբեր երկրների համար: Ասում են շախմատը գիտության, սպորտի եւ արվեստի սինթեզն է: Ինքս համարում եմ, որ Հայաստանը նոր քաղաքակրթությունների սկիզբն է եւ հավատում եմ, որ շախմատով Հայաստանը կսկսի համաշխարհային կրթության մի նոր փուլ»,- ասաց Եվրոպայի շախմատի միության նախագահ Զուրաբ Ազմայպարաշվիլին:
Լուսինե Շահբազյան
Հետևեք NEWS.am SPORT-ին Facebook-ում, Twitter և Telegram-ում