Եվրո-2012-ի եզրափակիչի առաջին ուղեգրի հասցեատերը հայտնի դարձավ միայն հետխաղայա 11 մետրանոցների արդյունքում:
Պորտուգալիա - Իսպանիա կիսաեզրափակիչ խաղում նշանակվեց հետխաղյա 11 մետրանոց հարվածաշար, որն ավելի դիպուկ իրացրին իսպանացիները:
Առաջին խաղակեսում դարպասի ուղղությամբ երկու վտանգավոր հարված կատարեցին իսպանացիները. 9-րդ րոպեին` Բուսկետսը, 29-րդ րոպեին` Ինյեստան: Երկու անգամ ոչ այքան վտանգավոր հարված կատարեց Կասիլյասի դարպասի ուղղությամբ Ռոնալդուն:
Ընդմիջումից հետո խաղի տեմպն ավելի ընկավ: Վտանգավոր գոլային պահերը գրեթե բացակայում էին: Իսպանիայի հավաքականի գլխավոր մարզիչ Վիսենտե դել Բոսկեն Նեգրեդոյի փոխարեն խաղադաշտ դուրս բերեց Սեսկ Ֆաբրեգասին: Սակայն սրություն Իսպանիայի հավաքականի խաղում չհայտնվեց: Անվերջ պրեսինգի վրա սպառվում էին նաեւ Պորտուգալիայի հավաքականի ուժերը: Տուգանայինից երկու հարված կատարեց Կասիլյասի դարպասի ուղղությամբ Ռոնալդուն, երկու դեպքում էլ բարձր էր:
Լրացուցիչ առաջին խաղակեսում, 104-րդ րոպեին Խորդի Ալբայի փոխանցումից հետո Անդրես Ինյեստան մեն-մենակ հայտնվեց Պորտուգալիայի հավաքականի դարպասապահ Ռուի Պատրիսիուի դեմ, մեկ հպումով հարված կատարեց դարպասին, սակայն Պատրիսիուն կարողացավ փրկել պորտուգալացիներին:
Երկրորդ 15 րոպեների ընթացքում իրական գոլային պահեր չգրանցվեցին:
Նշանակվեցին հետխաղյա 11 մետրանոցներ:
Չավի Ալոնսոյի ու Ժոաու Մոուտինյուի հարվածներից հետո դարպասապահները հետ մղեցին գնդակը` 0:0:
Անդրես Ինյեստան ու Պեպեն չվրիպեցին` 1:1:
Պիկեն ու Նանին եւս ոչ մի շանս չտվեցին համապատասխանաբար Պատրիսիուին եւ Կասիլյասին` 2:2:
Սերխիո Ռամոսը գրավեց Պատրիսիուի դարպասը, իսկ Բրունու Ալվեշը հարվածեց հորիզոնական դարպասաձողին` 3:2:
Սեսկ Ֆաբրեգասի հարվածը հաղթանակ բերեց Իսպանիային` 4:2
Դոնեցկ
Եվրո-2012. Կիսաեզրափակիչ
Պորտուգալիա – Իսպանիա` 0:0, 2:4 - 11 մետրանոցներով
Հետևեք NEWS.am SPORT-ին Facebook-ում, Twitter և Telegram-ում