Ֆուտբոլի Ալբանիայի հավաքականի գլխավոր մարզիչ Ջանի Դի Բիազին հետխաղյա ասուլիսում մեկնաբանեց Հայաստանի նկատմամբ արտագնա հաղթանակը Եվրոպայի առաջնության ընտրական փուլի վերջին տուրի խաղում:
«Երեկ խոսել էի Ֆրանսիա մեկնելու մասին, իսկ այսօր լուծեցինք այդ խնդիրը: Սա շատ կարեւոր նվաճում է Ալբանիայի եւ Հայաստանի պես երկրների համար: Հայաստանի ֆուտբոլի ֆեդերացիային շնորհավորում եմ լավ թիմ ունենալու կապակցությամբ: Այս խաղն առանձնահատուկ էր ինձ համար: Ես հաջողության էի հասել նաեւ «Տորինոյում», բայց հավաքականների մակարդակով հաջողությունը շատ ավելի կարեւոր էր: 3:0 հաշվից թող չթվա, որ հեշտ խաղ էր մեզ համար: Շատ բարդ հանդիպում էր, բայց հասանք մեր նպատակին»,- ասաց իտալացի մասնագետը, որին հայ լրագրողները ծափերով ընդունեցին ասուլիսների սրահում:
Հիշեցնենք, որ Երեւանի «Հանրապետական» ստադիոնում կայացած խաղում ալբանացիներն առավելության հասան 3:0 հաշվով եւ, 14 միավորով ընտրական I խմբում գրավելով երկրորդ տեղը, պատմության մեջ առաջին անգամ նվաճեցին Եվրոպայի առաջնության ուղեգիր:
Դավիթ Եղիազարյան
Լուսանկարն՝ Արսեն Սարգսյանի / NEWS.am Sport
Հետևեք NEWS.am SPORT-ին Facebook-ում, Twitter և Telegram-ում