Երեւանի «Փյունիկի» գլխավոր մարզիչ Սարգիս Հովսեփյանը նախախաղային ասուլիսում խոսեց Սան Մարինոյի չեմպիոն «Ֆոլգորեի» դեմ Չեմպիոնների լիգայի որակավորման առաջին փուլի առաջին հանդիպման մասին:
«Լրջությամբ ենք պատրաստվում այս խաղին, քանի որ եթե «Ֆոլգորեին» չանցնենք, ցույց կտանք, որ պատրաստ չենք այս մակարդակի հանդիպումների: Պատրաստ ենք եւ վաղը խաղալու ենք միայն հաղթանակի համար: Կցանկանայի վաղը տղաներն այնպես խաղան, որ 80 տոկոսով վճռեն դիմակայության ելքը»:
Իհարկե, դիտել ենք մրցակցի խաղը: Եթե հնարավորություն տանք նրանց, «Ֆոլգորեն» կարող է լավ փոխանցումներով վտանգ ստեղծել: Սակայն, եթե մենք գործենք բարձր արագությամբ, նրանք եւս խնդիրներ կունենան:
Ինչ վերաբերում է նորեկներին, ապա միայն նախախաղային մարզմանը կորոշենք, թե ով է ընդգրկվելու մեկնարկային կազմում: Այժմ հույսներս դնում ենք այն տղաների վրա, որոնք կան: «Ֆոլգորեին» անցնելու դեպքում, հնարավոր է, որ կունենանք եւս մեկ համալրում:
Կորուստների մասին կասեմ, որ Մասիս Ոսկանյանն ու Դավիթ Մանոյանն ունեն վնասվածքներ: Լավ կլիներ, որ նրանք խաղային, բայց այս կազմով էլ կարող ենք ցույց տալ լավ ֆուտբոլ: Մնացած բոլորը պատրաստ են խաղին: Այսպիսի բարդ առաջնությունից հետո բոլորն էլ հասկանում են, որ ամեն ինչ պետք է անենք Չեմպիոնների լիգայում հաջող հանդես գալու համար:
Սեզար Ռոմերոն մինչեւ օգոստոս ամիսը պայմանագիր ունի ակումբի հետ, իսկ եթե դրանից հետո նա ցանկանա հեռանալ, «Փյունիկը» ոչ ոքի չի պահում: Ամեն բան կախած է ակումբի ղեկավարությունից եւ համատեղ համագործակցությունից»,- ասաց Հովսեփյանը, ով նաեւ Հայաստանի ազգային հավաքականի գլխավոր մարզիչի պաշտոնակատարն է:
Հիշեցնենք, որ «Փյունիկ» - «Ֆոլգորե» հանդիպումը տեղի կունենա հունիսի 30-ին Վազգեն Սարգսյանի անվան «Հանրապետական» ստադիոնում եւ կսկսվի ժամը 20:00-ին: «Ֆոլգորեի» արգելքը հաղթահարելու դեպքում Հայաստանի չեմպիոնը որակավորման երկրորդ փուլում կհանդիպի նորվեգական «Մոլդեի» հետ:
Դավիթ Եղիազարյան
Հետևեք NEWS.am SPORT-ին Facebook-ում, Twitter և Telegram-ում