Բուլղարիա մայրաքաղաք Սոֆիայում անցկացվող ծանրամարտի Եվրոպայի առաջնությունում տեղի ունեցավ տղամարդկանց 102 կգ քաշային կարգի չեմպիոնի եւ մեդալակիրների պարգեւատրման արարողությունը:
Հայաստանի ներկայացուցիչ Սամվել Գասպարյանը պարգեւատրվեց երկամարտի արծաթե, պոկում վարժության փոքր բրոնզե եւ հրում վարժության փոքր արծաթե մեդալներով:
Գարիկ Կարապետյանը պարգեւատրվեց երկամարտի բրոնզե մեդալով, պոկում վարժության փոքր ոսկե մեդալով:
Սամվել Գասպարյանը երկամարտի 396 կգ արդյունքով նվաճեց փոխչեմպիոնի կոչումը (180+216): Գարիկ Կարապետյանը 394 կգ արդյունքով բրոնզե մեդալակիր է (182 + 212):
102 կգ քաշային կարգի Եվրոպայի չեմպիոնի տիտղոսը երկամարտի 398 կգ արդյունքով նվաճեց աշխարհի եւ Եվրոպայի չեմպիոն, բելառուս Եվգենի Տիխոնցովը:
Քիչ անց կմեկնարկի տղամարդկանց 109 կգ քաշային կարգի պայքարը, որտեղ Հայաստանն ունի մեկ մասնակից: Տիտղոսի համար կպայքարի Եվրոպայի բրոնզե մեդալակիր Պետրոս Պետրոսյանը:
Այս քաշային կարգում պայքարի մեջ կլինի 11 ծանրորդ: Պետրոս Պետրոսյանը երկամարտում հայտավորվել է 380 կգ պատվերով: Նույնքան են պատվիրել նաեւ վրազի Զազա Լոմաձեն եւ ադրբեջանցի Դադաշ Դադաշբայլին:
Երեւանում անցկացված Եվրոպայի առաջնությունում երիտասարդների աշխարհի փոխչեմպիոն, Մ23 եւ Մ20 Եվրոպայի փոխչեմպիոն Պետրոս Պետրոսյանը երկամարտի 379 կգ արդյունքով դարձավ բրոնզե մեդալակիր:
Ավելի ուշ մրցահարթակ դուրս կգան կանանց 87 կգ քաշային կարգի ներկայացուցիչները: Հայաստանի թիմից տիտղոսի համար կպայքարեն Եվրոպայի չեմպիոն, 2023 թ. Եվրոպայի բրոնզե մեդալակիր Հռիփսիմե Խուրշուդյանը եւ 2023 թ. Եվրոպայի փոխչեմպիոն Տաթեւ Հակոբյանը:
6 տարվա դադարից հետո մրցահարթակ դուրս եկած Հռիփսիմե Խուրշուդյանը նախնական հայտավորվել է երկամարտի 240 կգ-ով: Նույնքան նախնական պատվեր ունի նաեւ Տաթեւ Հակոբյանը: Հայ ծանրորդներից 20 կգ ավել նախնական հայտ ունի նորվեգացի Սոլֆրիդ Էիլա Ամենա Կոանդան (260 կգ):
Երեւանում անցկացված ծանրամարտի Եվրոպայի առաջնությունում Հռիփսիմե Խուրշուդյանը երկամարտի 227 կգ արդյունքով նվաճել է բրոնզե մեդալ (107+120)։
Տաթեւ Հակոբյանը Երեւանում մասնակցել է 76 կգ քաշային կարգում եւ երկամարտի 226 կգ արդյունքով նվաճել փոխչեմպիոնի կոչումը (104+122):
Սեպտեմբերի Սաուդյան Արաբիայում անցկացված աշխարհի առաջնությունում Տաթեւ Հակոբյանը երկամարտի 237 կգ-ով գրավեց 5-րդ տեղը (105+132), Հռիփսիմե Խուրշուդյանը 235 կգ-ով 6-րդն էր (105+130):
Կանանց 87 կգ քաշային կարգի A խմբի պայքարը կմեկնարկի 22:00-ին:
Եվրոպայի առաջնությունը վարկանիշային է Փարիզի Օլիմպիական խաղերի համար: Փաշիկ Ալավերդյանի գլխավորած տղամարդկանց հավաքականի կազմում Սոֆիայի մրցահարթական դուրս կգան նաեւ Վարազդատ Լալայան (+109 կգ), Սիմոն Մարտիրոսյան (+109 կգ):
Սոֆիայում ընթացող Եվրոպայի առաջնությունում Հայաստանն արդեն նվաճել են 3 ոսկե, 1 արծաթե եւ 1 բրոնզե մեդալներ:
Եվրոպայի չեմպիոններ են դարձել Ալեքսանդրա Գրիգորյանը (55 կգ), Գոռ Սահակյանը (67 կգ) եւ Հակոբ Մկրտչյանը (96 կգ): Արծաթե մեդալակիր է Դավիթ Հովհաննիսյանը (96 կգ), բրոնզե մեդալակիր՝ Ռաֆիկ Հարությունյան (81 կգ):
Հետևեք NEWS.am SPORT-ին Facebook-ում, Twitter և Telegram-ում