Մենք կարող ենք հաղթել իտալացիներին երկրպագուների աջակցության, մեր նվիրվածության եւ աշխատասիրության շնորհիվ, NEWS.am Sport-ի թղթակցի հետ զրույցում ասաց Հայաստանի ազգային հավաքականի եւ Դոնեցկի «Մետալուրգի» հարձակվող Գեւորգ Ղազարյանը, ով որակազրկման պատճառով բաց կթողնի Հայաստան - Իտալիա հանդիպումը:
Գեւորգ մի քանի օր է գտնվում ես Հայաստանում, բայց հավաքականի հետ չես մարզվում ֆուտբոլի ակադեմիայում։ Ո՞րն է ժամանելուդ նպատակը:
Ինձ թիմում հնգօրյա արձակուրդ էին տվել: Ես ցանկացա այն անցկացնել Հայաստանում, ընտանիքիս հետ: Ինչպես նաեւ հանդիպել հավաքականի ընկերներիս հետ: Այսօր հետ եմ մեկնում Ուկրաինա: Հոկտեմբերի 11-ին սկսվում են մեր մարզումները:
Դժվա՞ր է հետեւել հավաքականի մարզումներին եւ շատ կարեւոր խաղի նախապատրաստմանը կողքից:
Շատ կարեւոր խաղ է սպասվում մեզ: Ես շատ կցանկանայի մասնակցել, բայց… Հետեւել կողքից իհարկե դժվար է: Ես Մալթայի հետ խաղին էլ չմասնակցեցի, բայց այն ժամանակ պատճառը վնասվածքս էր:
Բարդ խաղ է սպասվում, կորուստներ ունենք: Ի՞նչ հաշիվ ես կանխատեսում:
Այո, շատ դժվար խաղ է մեզ սպասվում: Բայց մենք կհաղթենք Իտալիային 2:1 հաշվով:
Ինչի՞ շնորհիվ մեր հավաքականը կարող է հաղթել Եվրոպայի փոխչեմպիոններին:
Առաջին հերթին մեր երկրպագուների աջակցության, այնուհետեւ մեր նվիրվածության եւ աշխատասիրության շնորհիվ: Այս հատկանիշներով մենք կգերազանցենք նրանց: Իսկ վարպետությամբ էլ կարծում եմ չենք զիջի:
Զրուցեց Վերա Մարտիրոսյանը
Հետևեք NEWS.am SPORT-ին Facebook-ում, Twitter և Telegram-ում