Հայաստանի բազմակի չեմպիոն Երեւանի «Փյունիկը» երկար տարիներ չեմպիոնական տիտղոսը չէր զիջում բարձրագույն խմբի առաջնության ոչ մի թիմի: Անցյալ տարի «Փյունիկը» գրավեց երկրորդ տեղը` առաջ թողնելով «Ուլիսին»: Թիմի կազմում սկսեցին հանդես գալ երիտասարդ ֆուտբոլիստներ, իսկ գլխավոր մարզչի պաշտոնում այս տարի թիմին առաջնորդելու է Սուրեն Չախալյանը: Այժմ «Փյունիկը» գտնվում է Արաբական Միացյալ Էմիրություններում, որտեղ անցկացնում է մրցաշրջանի մեկնարկից առաջ վերջին հավաքը: Կատարված աշխատանքների եւ սպասելիքների մասին NEWS.am Sport-ի թղթակիցը զրուցել է թիմի գլխավոր մարզիչ Սուրեն Չախալյանի հետ:
Պարոն Չախալյան, մինչեւ ուսումնամարզական վերջին հավաքին մեկնելը ինչ-որ ծրագրել էիք կատարվե՞լ է, եւ դուք գո՞հ եք ֆուտբոլիստների ներկայիս մարզավիճակից:
Այս պահի դրությամբ ըստ նախատեսցածի ամեն ինչ կատարվել է: Թիմի համար ստեղծվել էին բոլոր պայմանները մարզումներն անցկացնելու եւ ինչպես հարկն է նախապատրաստվելու համար: Ֆուտբոլիստներն էլ իրենց աշխատանքը կատարում են մեծ նվիրվածությամբ, եւ դա բնականաբար գոհացնող հանգամանք է: Ամենակարեւոն այն է, որ լուրջ վնասվածքներ չունենք, եւ բոլոր ֆուտբոլիստներն էլ շարքում են: Ինչպես գիտեք, մենք փորձարկում էինք Ռուսաստանից ժամանած երկու հայ երիտասարդ ֆուտբոլիստների: Առայժմ մենք գոհ ենք նրանցից, եւ երկուսն էլ մասնակցելու են երրորդ հավաքին:
Իսկ ստուգողական հանդիպումների մասին ի՞նչ կասեք:
Ստուգողական հանդիպումների ընթացքում մենք ստուգում էինք, կարելի է ասել, մեր մարզումների արդյունքները: Պետք էր հասականալ, թե ինչում են թերանում ֆուտբոլիստները եւ ինչն է լավ ստացվում: Արդյուքները նման խաղերում, իհարկե, առաջնային կարեւորություն չունեն: Մեզ հարկավոր է թիմի նախապատրաստությունը ճիշտ ճանապարհով տանել, եւ դա հասկանալու համար էլ հարկավոր են ստուգողական հանդիպումները: Եղան պարտություններ, որոնք այնքան էլ ցանկալի չէին: Կոնկրետ ԲՄԱ-Էներգիայի հետ մրցավեճը մեր թիմը անցկացրեց ոչ լիարժեք կազմով, քանի որ շատ խաղացողներ ազգային հավաքական էին հրավիրվել: Մյուսների համար դա շատ կարեւոր փորձություն էր եւ դաս:
«Փյունիկը» անցյալ առաջնության վերջնամասում լրիվ երիտասարդ ֆուտբոլիստներով էր հանդես գալիս: Հիմա էլ համալրումը նորից երիտասարդներ են: Ըստ ձեզ «Փյունիկը» նման կազմով ինչպիսի՞ խնդիրներ կարող է լուծել:
Դե, կարծում եմ, հասկանալի է, որ «Փյունիկը» պայքարել ու պայքարելու է միայն չեմպիոնական տիտղոսի համար: Թիմի ներկայիս կազմն էլ, ըստ իս, լրիվ հնարավորություններ ունի ու կպայքարի մեր նպատակները իրականացնելու համար:
Հայաստանի առաջնությունը բնականաբար այլ նպատակներ ու լարվածություն ունի, Եվրոպայի լիգայի մրցաշարը` այլ: Այս կազմով «Փյունիկը» կկարողանա՞ արժանի հանդես գալ ակումբային այս հեղինակավոր մրցաշարում:
Հիմա կարեւորն է արժանի կերպով մեկնարկել մեր առաջնությունում ու շարունակել հաջող ելույթները: Թե ինչ կլինի հետո, հիմա չեմ էլ կարող ասել: Թիմի կազմը սա է, եւ, ինչպես գիտեք, «Փյունիկը» շեշտը դնում է իր կադրերի վրա:
Արտասահմանցի ֆուտբոլիստների մասին խոսք չկա:
Ոչ, մենք խաղալու ենք միայն մեր ֆուտբոլիստներով, եւ ակումբը նոր խաղացողներ արտասահմանից չի հրավիրելու: Հիմա ներկայիս կազմում խաղային մեկ դիրքի վրա բավականին մեծ մրցակցություն կա: Մեր թիմի խաղացողները հանդիսանում են մեր ազգային եւ տարիքային տարբեր հավաքականների խաղացողներ են, այնպես որ խաղային պրակտիկան ու փորձը մեր տղաներին իհարկե պետք կգան:
Զրուցեց Խաչիկ Չախոյանը
Հետևեք NEWS.am SPORT-ին Facebook-ում, Twitter և Telegram-ում
00:47 , 21 մայիսի 
00:36 , 21 մայիսի 
23:11 , 20 մայիսի 
22:05 , 20 մայիսի 
21:33 , 20 մայիսի 
21:04 , 20 մայիսի 
20:47 , 20 մայիսի 
20:09 , 20 մայիսի 
19:42 , 20 մայիսի 
19:10 , 20 մայիսի 
