Արթուր Գեւորգյան. Բռնցքամարտի ֆեդերացիայի ֆինանսավորումը շարունակվելու է

Հայաստանի բռնցքամարտի ֆեդերացիայի նախագահ Արթուր Գեւորգյանը հայտնել է, որ ՀԲՖ-ն դատարան է դիմել Սպորտի նախարարության կողմից ֆեդերացիայի ֆինանսավորումը դադարեցնելու վերաբերյալ։

«Հարգելի հայրենակիցներ, ինչպես հայտնի է ՀՀ սպորտի եւ երիտասարդության նախարարությունը ,ինչպես միշտ հանդես գալով կամակատարի դերում, կասեցրել է ՀՀ բռնցքամարտի ֆեդերացիայի պետական ֆինանսավորումը՝ հիմքում դնելով ակնհայտ անհիմն հիմնավորում:

Բնականաբար այս ապօրինությունը չէր կարող անարձագանք մնալ եւ օրեր առաջ դիմել ենք ՀՀ վարչական դատարան՝ խնդրելով անվավեր ճանաչել ՀՀ բռնցքամարտի ֆեդերացիայի ֆինանսավորումը կասեցնելու մասին նախարարի ակնհայտ ոչ իրավաչափ հրամանը:

Ավելորդ չեմ համարում նշել նաեւ, որ նշված ապօրինությունը մասամբ վերացվել է եւ դատարանի վարույթ ընդունելու որոշմամբ կասեցվել է այդ հրամանի գործողությունը, այսինքն բռնցքամարտի ֆեդերացիայի ֆինանսավորումը շարունակվելու է:

Մանրամասների մասին լրացուցիչ կտեղեկացնենք»- գրել է ՀԲՖ նախագահն իր ֆեյսբուքյան էջում: