Անչելոտի. «Արսենալի» դեմ հանդիպումը տեւեց 30 րոպե
16:18 19 ապրիլի, 2019Իտալական «Նապոլիի» գլխավոր մարզիչ Կարլո Անչելոտին մեկնաբանել է Եվրոպայի լիգայի քառորդ եզրափակիչի պատասխան խաղում Լոնդոնի «Արսենալից» կրած տնային պարտությունը նվազագույն հաշվով:
«Հանդիպումը տեւեց 30 րոպե: Ծանր էր: «Նապոլին» ունեցավ 2 հրաշալի պահեր, որոնք իրացնելու դեպքում կունենայինք հաջորդ փուլ դուրս գալու շանսեր: «Արսենալի» գոլից հետո մենք վայր դրեցինք զենքերը:
Վերջին շրջանում «Նապոլիին» չի բավականացնում սրությունն առջեւի գծում: Մենք դանդաղ ենք գործում ու կանխատեսելի, ինչը ստեղծում է խնդիրներ»,- իտալացի մասնագետի խոսքը մեջբերում է Sky Sport Italia-ն:
Հիշեցնենք, որ Նեապոլում տեղի ունեցած պատասխան խաղում Հայաստանի հավաքականի կիսապաշտպան Հենրիխ Մխիթարյանն անգլիական ակումբի կազմում դաշտ էր դուրս եկել 34-րդ րոպեին՝ փոխարինելով վնասվածք ստացած Աարոն Ռեմզիին։ Դա Մխիթարյանի 50-րդ հանդիպումն էր «Արսենալի» կազմում:
«Արսենալը» «Նապոլիին» հաղթել էր նաեւ առաջին խաղում՝ 2:0:
Եվրոպայի լիգայի կիսաեզրափակիչում լոնդոնյան ակումբը կխաղա Ունաի Էմերիի նախկին ակումբ իսպանական «Վալենսիայի» հետ, իսկ եզրափակիչի մյուս ուղեգիրը կվիճարկեն Լոնդոնի «Չելսին» ու Ֆրանկֆուրտի «Այնտրախտը»:
© 2024 NEWS.am - Sport
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։