Հյոն-Մին Սոնը՝ Չեմպիոնների լիգայում ամենաշատ գոլ խփած ասիացի ֆուտբոլիստ

10:10   18 ապրիլի, 2019

Լոնդոնի «Տոտենհեմի» կորեացի կիսապաշտպան Հյոն-Մին Սոնը, դուբլ ձեւակերպելով «Մանչեսթեր Սիթիի» դեմ Չեմպիոնների լիգայի քառորդ եզրափակիչի պատասխան խաղում, դարձել է այդ մրցաշարում ամենաշատ գոլ խփած ասիացի ֆուտբոլիստը:

Չեմպիոնների լիգայում 26-ամյա Սոնը գոլերի քանակը հասցրել է 12-ի եւ գերազանցել Կիեւի «Դինամոյի» ու Ուզբեկստանի հավաքականի նախկին հարձակվող Մաքսիմ Շացկիխի ռեկորդը (11 գոլ), փոխանցում է Gracenote Live-ը:

Հիշեցնենք, որ Մանչեսթերում կայացած խաղում «Տոտենհեմը» պարտվել էր 3:4 հաշվով, սակայն նվաճել էր Չեմպիոնների լիգայի կիսաեզրափակիչի ուղեգիր: Դիմակայությունում գրանցվեց 4:4 հաշիվը, եւ լոնդոնյան ակումբը հաջորդ փուլ դուրս եկավ մրցակցի դաշտում խփած 3 գոլերի շնորհիվ: Առաջին խաղում «Մանչեսթեր Սիթին» պարտվել էր նվազագույն հաշվով:

Չեմպիոնների լիգայի կիսաեզրափակիչի մյուս զույգը կազմել են անգլիական «Լիվերպուլն» ու կատալոնական «Բարսելոնան»: Կիսաեզրափակիչի առաջին խաղերը տեղի կունենան ապրիլի 30-ին, իսկ պատասխան հանդիպումները՝ մայիսի 1-ին: Եզրափակիչը կկայանա հունիսի 1-ին Մադրիդի «Աթլետիկոյի» տնային ստադիոն «Վանդա Մետրոպոլիտանոյում»:



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։