Դավիթ Հովհաննիսյան․ Առաջին անգամ էի մասնակցում մեծահասակների Եվրոպայի առաջնությանը եւ մեդալ նվաճեցի

Երբ արդեն հասակացա, որ կարող եմ մեդալ նվաճել, ամեն ինչ օգտագործեցի, որ հասնեմ դրան: Այս մասին Բաթումիում ասաց ծանրամարտի Եվրոպայի առաջնության բրոնզե մեդալակիր Դավիթ Հովհաննիսյանը:

«Շատ դժվար էր Եվրոպայի առաջնությունում մեդալի համար պայքարելը: Երբ արդեն գիտեի, որ հնարավորությունը կա, մեդալի պայքարը կա, ամեն ինչ օգտագործեցի, որ հասնեմ դրան: Չեմ կարող բացատրել, թե ինչպես ինձ հաջողվեց մեդալ նվաճել Եվրոպայի առաջնությունում:

Առաջին անգամ էի մասնակցում մեծահասակների Եվրոպայի առաջնությանը եւ մեդալ նվաճեցի. շատ ուրախ եմ: Նոր եմ բարձրացրել քաշս, առաջիկայում երեւի կմտածեմ այն փոխել օլիմպիական, բայց դեռ ժամանակ կա դրա համար: Հավատում էի, որ ամեն ինչ հաջող է ստացվելու: Առանց հավատի ոչ մի մրցման չեմ գնում: Այդպես էլ այստեղ էր»,- ասաց Դավիթ Հովհաննիսյանը:

Հիշեցնենք, որ Դավիթ Հովհաննիսյանը երկամարտում հավաքեց 360 կգ։  Պոկում վարժությունում նա 165 կգ արդյունքով նվաճեց փոքր բրոնզե մեդալ։ Հրում վարժությունում ցույց տվեց 195 կգ։

Լուսինե Շահբազյան, Արսեն Սարգսյան (Բաթումի)

NEWS.am Sport-ը լուսաբանումն իրականացնում է UCOM-ի աջակցությամբ