Ֆուտբոլի Հայաստանի Բարձրագույն խմբի առաջնությունում մարտի 31-ին անցկացվեցին 24-րդ տուրի 2 խաղեր: «Փյունիկը» 1:1 հաշվով ավարտեց «Բանանցի» դեմ արտագնա հանդիպումը, իսկ Վանաձորի «Լոռին» Երեւանում ոչ ոքի խաղաց «Արարատի» հետ՝ 2:2:
«Բանանցի» կազմում հաշիվը երկրորդ րոպեին բացեց Վահագն Այվազյանը, որը հայր է դարձել մարտի 31-ին: «Փյունիկին» ավելացված ժամանակում պարտությունից փրկեց «Բանանցի» նախկին կիսապաշտպան Ռումյան Հովսեփյանը:
«Լոռին» առաջին խաղակեսից հետո ուներ 2 գոլի առավելություն, սակայն ընդմիջումից հետո «Արարատը» խփեց 2 գոլ եւ խուսափեց պարտությունից: «Լոռիի» կազմում հերթական գոլը խփեց Հաիթիի հավաքականի հարձակվող Ջոնել Դեսիրեն, որը 11 գոլով միանձնյա գլխավորեց ռմբարկուների ցուցակը:
Այս ոչ ոքիից հետո «Փյունիկը» վաստակեց 37 միավոր եւ հավասարվեց երկրորդ տեղում գտնվող «Ալաշկերտին»: Չորրորդ տեղում գտնվող «Բանանցն» ունի 35 միավոր, իսկ «Լոռին» 31 միավորով 5-րդն է: «Արարատը» 15 միավորով նախավերջին տեղում է:
Մրցաշարային աղյուսակը գլխավորում է 38 միավոր հավաքած «Արարատ-Արմենիան», որը բաց է թողնում այս տուրը:
Բարձրագույն խմբի 24-րդ տուրն ապրիլի 1-ին կեզրափակվի «Արցախ» – «Գանձասար-Կապան» խաղով:
Հայաստանի առաջնություն, 24-րդ տուր
Մարտի 31
«Բանանց» - «Փյունիկ»՝ 1:1
Վահագն Այվազյան, 2 - Ռումյան Հովսեփյան, 90+2
«Լոռի» - «Արարատ»՝ 2:2
Նանա Անտվի, 26, Ջոնել Դեսիրե, 39 - Վարդան Արզոյան, 60, Սարգիս Մեթոյան, 69
Մարտի 30
«Շիրակ» - «Ալաշկերտ»՝ 1:1
Արամ Մուրադյան, 68 - Արթուր Եդիգարյան, 10
Ապրիլի 1
«Արցախ» – «Գանձասար-Կապան»՝ 14:00
Ֆոտո՝ ՀՖՖ
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։