Ֆուտբոլի Ֆինլանդիայի ազգային հավաքականի գլխավոր մարզիչ Մարկու Կաներվան Երեւանում անցկացված հետխաղյա ասուլիսում մեկնաբանեց Հայաստանի թիմի նկատմամբ 2:0 հաշվով հաղթանակը Եվրո-2020-ի ընտրական փուլի J խմբի երկրորդ տուրի խաղում, փոխանցում է NEWS.am Sport-ի թղթակիցը:
«Ինչպես եւ ակնկալում էինք, բավական բարդ հանդիպում էր, բայց կարողացանք հասնել հաջողության: Հանդիպման տարբեր ժամանակահատվածներում ունեցանք որոշ դժվարություններ, քանի որ Հայաստանի հավաքականի կազմում կա Հենրիխ Մխիթարյան եւ մի շարք այլ բարձրակարգ խաղացողներ:
Վստահ եմ, որ խմբի մյուս թիմերը եւս դժվարություններ են ունենալու Երեւանում: Բնականաբար, մենք ուսումնասիրել էինք մրցակցին եւ գիտեինք, որ որոշակի թուլություն կա ձախ եզրում, սակայն դրա փոխարեն Հայաստանի հավաքականի աջ եզրը բավական ակտիվ էր: Շնորհակալություն Հայաստանին հյուրընկալության համար»,- նշեց Կաներվան:
Հիշեցնենք, որ Երեւանի Վազգեն Սարգսյանի անվան «Հանրապետական» ստադիոնում Հայաստանի հավաքականն առաջին տնային հանդիպումն անցկացրեց Եվրո-2020-ի ընտրական փուլում եւ կրեց երկրորդ պարտությունը: Առաջին տուրում Հայաստանի հավաքականը Սարաեւոյում 1:2 հաշվով պարտվել էր Բոսնիայի եւ Հերցեգովինային, իսկ Ֆիլնադիայի թիմը հյուրընկալվելիս պարտություն էր կրել իտալացիներից՝ 0:2:
Հայաստանի հավաքականը հաջորդ ընտրական հանդիպումը կանցկացնի հունիսի 8-ին՝ Երեւանում ընդունելով Լիխտենշտեյնի թիմին:
Դավիթ Եղիազարյան
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։