Հայաստանի ազգային հավաքականի ֆուտբոլիստները լրագրողների հետ զրույցում մեկնաբանել են Բոսնիա-Հերցեգովինայի թիմից կրած 1:2 հաշվով պարտությունը Եվրո-2020-ի ընտրական փուլի J խմբի առաջին տուրի արտագնա խաղում, Սարաեւոյից փոխանցում է NEWS.am Sport-ի թղթակիցը (LIVE)։
Վարազդատ Հարոյան. «Վատ չխաղացինք: Պարտվեցինք, բայց հիմա պետք է պատրաստվենք հաջորդ հանդիպմանը, որն ավելի կարեւոր է, քանի որ տանն ենք խաղում: Ամեն ինչ կանենք երկրպագուներին ուրախացնելու համար: Հայաստանի հավաքականի բոլոր պաշտպաններն էլ բարձր մակարդակի խաղացողներ են, եւ բոլորի հետ էլ համագործակցությունը ստացվում է: Կարծում եմ, որ այսօրվա խաղում մի քիչ հավատը պակասեց: Լավ էինք պաշտպանվում, սակայն մրցակիցը ստանդարտ դիրքերի ժամանակ առավելություն ուներ բարձրահասակ խաղացողների շնորհիվ: Արդեն տեսանք, որ մենք եւս լավ ֆուտբոլ ենք խաղում եւ կարող ենք հաղթել»:
Կամո Հովհաննիսյան. «Երեւի, այսօր չբավականացրեց հավատը, որ կարող ենք խաղալ նման թիմերի դեմ: Ունեինք գոլ խփելու հնարավորություններ, պարզապես չստացվեց: Երեւի, այսօր բախտի գործոնը մեր կողմից չէր: Տխուր է, որ պարտվեցինք, բայց ինչ արած՝ ֆուտբոլ է: Կանենք հետեւություններ եւ կպատրաստվենք Ֆինլանդիայի դեմ հանդիպմանը: Իհարկե, այս խաղում հավատն ավելացավ: Հաջորդ խաղին դաշտ դուրս կգանք հետեւություններ արած»:
Արամ Հայրապետյան. «Ցավալի պարտություն էր, քանի որ 0:1 հաշվի ժամանակ ունեցանք պահեր, սակայն մեր բախտը մի քիչ չբերեց: Կարող էինք գոլ խփել, բայց պարտվեցինք: Վնասվածքից լիովին վերականգնվել եմ եւ արդեն պատրաստ եմ 100 տոկոսով: Սկզբնամասում մրցակցի երկրպագուների կողմից ճնշում կար, սակայն հետո հարմարվեցինք դրան: Կոմպակտ խաղ ցուցադրեցինք, սակայն պարտվեցինք»:
Էդգար Բաբայան․ «Դժվար խաղ էր, բայց գոլ խփելու լավ շանսեր ունեինք։ Չհաղթեցինք, փորձեցինք, չստացվեց։ Մի քիչ հիասթափված ենք։
Հիմա պետք է վերադառնանք տուն, հանգստանանք, որ հաջորդ խաղին պատրաստ լինենք»։
Գագիկ Դաղբաշյան. «Հաջող չստացվեց խաղը եւ պարտվեցինք: Ասելու շատ բան չկա, մենք ենք մեղավոր պարտության համար: Պաշպանությունում կարգապահ խաղ էինք ցուցադրում, բայց մեկ դրվագում սխալվեցինք եւ գոլ բաց թողեցինք: Նույնը եղավ երկրորդ գոլի դրվագում, սակայն մենք եւս ունեցանք գոլ խփելու հնարավորություններ: Ափսոս, որ չստացվեց գոլ խփել, այլապես խաղն այլ ընթացք կստանար»:
Հիշեցնենք, որ մարտի 23-ին Սարաեւոյի «Գրբավիցա» ստադիոնում կայացած խաղում Հայաստանի հավաքականը պարտվել էր 1:2 հաշվով: Հանդիպման հաշիվն ավելացրած ժամանակում կրճատել էր Լոնդոնի «Արսենալի» կիսապաշտպան Հենրիխ Մխիթարյանը, որն անվրեպ իրացրեց 11 մետրանոց հարվածը:
Մարտի 24-ի առավոտյան Հայաստանի հավաքականը Երեւան ժամանելուց առաջ Բոսնիա-Հերցեգովինայի մայրաքաղաք Սարաեւոյում կանցկացնի վերականգնողական մարզում, ինչից հետո կվերադառնա Երեւան եւ կպատրաստվի Ֆինլանդիայի թիմի դեմ Եվրո-2020-ի ընտրական փուլի երկրորդ տուրի հանդիպմանը:
Հայաստան – Ֆինլանդիա խաղը տեղի կունենա մարտի 26-ին Երեւանի «Հանրապետական» ստադիոնում:
Դավիթ Եղիազարյան, Սամվել Սուքիասյան՝ Սարաեւոյից
NEWS.am Sport-ը լուսաբանումն իրականացնում է UCOM-ի աջակցությամբ
Ֆոտո՝ ՀՖՖ
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։