Ֆուտբոլի Բոսնիայի եւ Հերցեգովինայի ազգային հավաքականի գլխավոր մարզիչ Ռոբերտ Պրոսինեչկին Սարաեւոյում անցկացված հետխաղյա ասուլիսում մեկնաբանեց Հայաստանի թիմի նկատմամբ 2:1 հաշվով տնային հաղթանակը Եվրո-2020-ի ընտրական փուլի J խմբի առաջին տուրի խաղում, Սարաեւոյից փոխանցում է NEWS.am Sport-ի թղթակիցը:
«Առաջին խաղակեսում մենք ցուցադրեցինք լավ խաղ, իսկ ընդմիջումից հետո Հայաստանի հավաքականն ուներ որոշակի առավելություն: Առաջին խաղակեսում մրցակիցը միայն մեկ անգամ սպառնաց մեր դարպասին:
Կարեւոր է, որ վաստակեցինք 3 միավոր: Հաջորդ խաղերում կփորձենք ավելի արդյունավետ իրացնել մեր գոլային պահերը: Եթե շարունակենք աշխատել նույն կերպ, կարող ենք հաջորդ խաղերում եւս խնդիրներ առաջացնել մրցակիցների համար:
Մնում եմ նույն կարծիքին, որ Հայաստանի հավաքականը բարդ մրցակից է: Հայաստանի թիմն ինձ անակնկալի բերեց երկրորդ խաղակեսում եւ խնդիրներ առաջացրեց մեզ համար»,- նշեց խորվաթ մասնագետը:
Հիշեցնենք, որ Սարաեւոյի «Գրբավիցա» ստադիոնում կայացած խաղում հյուրերից հաշիվն ավելացրած ժամանակում կրճատեց Լոնդոնի «Արսենալի» կիսապաշտպան Հենրիխ Մխիթարյանը, որն անվրեպ իրացրեց 11 մետրանոց հարվածը:
Մարտի 26-ին Հայաստանի հավաքականը Եվրո-2020-ի ընտրական փուլի երկրորդ տուրում Երեւանում կընդունի Ֆինլանդիայի թիմին:
Դավիթ Եղիազարյան՝ Սարաեւոյից
NEWS.am Sport-ը լուսաբանումն իրականացնում է UCOM-ի աջակցությամբ
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։