Արմեն Գյուլբուդաղյանց. Արդյունքից գոհ չեմ, բայց վստահ եմ՝ տղաները կարող են ավելի լավ խաղալ
02:04 24 մարտի, 2019Ֆուտբոլի Հայաստանի ազգային հավաքականի գլխավոր մարզիչ Արմեն Գյուլբուդաղյանցը Սարաեւոյում տեղի ունեցած հետխաղյա ասուլիսում մեկնաբանեց Բոսնիա-Հերցեգովինայի թիմից կրած 1:2 հաշվով պարտությունը Եվրո-2020-ի ընտրական փուլի J խմբի առաջին տուրի խաղում, Սարաեւոյից փոխանցում է NEWS.am Sport-ի թղթակիցը:
«Կարծում եմ՝ առաջին խաղակեսում եւս լավ խաղացինք, ինչպես ընդմիջումից հետո: Երկրորդ կեսում դաշտ դուրս բերեցինք առջեւի գծի թարմ խաղացողների եւ սկսեցինք ավելի ակտիվ գործել հարձակման գծում:
Մենք լավատես ենք յուրաքանչյուր խաղում եւ կարծում ենք, որ հաջորդ մրցավեճում կգործենք ավելի լավ: Բոսնիա-Հերցեգովինայի հավաքականը խաղաց լավ ֆուտբոլ: Ֆուտբոլում չկա այդպիսի բան՝ թիմն արժանի է հաղթանակի, թե՝ ոչ: Ես շնորհավորեցի մրցակցի թիմի գլխավոր մարզիչին:
Չեմ ասի, որ ստանդարտ դիրքերի ժամանակ խնդիրներ ունենք, պարզապես մրցակիցը հաջող իրացրեց դրանք: Արամ Հայրապետյանը մի քանի դրվագներում փրկեց թիմին, բայց դարպասապահի համար կարեւոր է կայուն խաղ ցուցադրելը: Կցանկանայի, որ դա շարունակական լինի: Չեմ կարող ասել, որ մրցակցի գոլերի դրվագում գոլը հասունացել էր: Արդյունքից գոհ չեմ, բայց վստահ եմ, որ տղաները կարող են ավելի լավ խաղալ: Ամեն ինչ անում ենք, որպեսզի հասցնենք վերականգնվել հաջորդ խաղին: Դեռ չեմ կարող ասել, թե լինելու են փոխարինումներ հաջորդ խաղում»,- նշեց Արմեն Գյուլբուդաղյանցը:
Հիշեցնենք, որ Սարաեւոյի «Գրբավիցա» ստադիոնում կայացած խաղում հյուրերից հաշիվն ավելացրած ժամանակում կրճատեց Լոնդոնի «Արսենալի» կիսապաշտպան Հենրիխ Մխիթարյանը, որն անվրեպ իրացրեց 11 մետրանոց հարվածը: Մարտի 26-ին Հայաստանի հավաքականը Եվրո-2020-ի ընտրական փուլի երկրորդ տուրում Երեւանում կընդունի Ֆինլանդիայի թիմին:
Դավիթ Եղիազարյան՝ Սարաեւոյից
NEWS.am Sport-ը լուսաբանումն իրականացնում է UCOM-ի աջակցությամբ
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.