Հայաստանի հավաքականի ֆուտբոլիստների մրցելույթները ակումբներում

Հայաստանի ազգային հավաքականի ֆուտբոլիստները հանգստյան օրերին ազգային առաջնություններում մասնակցել են հանդիպումների։

Ռուսաստանի Պրեմյեր լիգայի 20-րդ տուրում «Ուրալը» տանը նվազագույն հաշվով պարտվել է Մոսկվայի ԲԿՄԱ-ին։ Եկատերինբուրգի թիմի կազմում 85-րդ րոպեին փոխարինման է դուրս եկել պաշտպան Վարազդատ Հարոյանը։

«Ենիսեյը» հյուրընկալվելիս 0։2 հաշվով պարտվել է Տուլայի «Արսենալին»։ Հյուրերի կազմում ամբողջ հանդիպումն անցկացրել է դարպասապահ Դավիթ Յուրչենկոն, հարձակվող Արթուր Սարկիսովը փոխարինման է դուրս եկել ընդմիջմանը։

Լյուքսեմբուրգի առաջնության 17-րդ տուրում «Պրոգրեսը» տանը նվազագույն հաշվով պարտվել է «Համ Բենֆիկային»։ Գոլային փոխանցման հեղինակ է դարձել հարձակվող Ալեքսանդր Կարապետյանը։

Կիպրոսի առաջնության հերթական տուրում «Էնոսիսը» արտագնա խաղում 2։1 հաշվով հաղթել է «Էրմիսին»։ Հյուրերի կազմում ամբողջ հանդիպումն անցկացրել է պաշտպան Հովհաննես Համբարձումյանը։

Մակեդոնիայի առաջնության 25-րդ տուրում «Ռաբոտնիչկին» մրցակցի խաղադաշտում նվազագույն հաշվով պարտվել է «Շկենդիային»։ Հյուրերի կազմում ամբողջ խաղն անցկացրել է կիսապաշտպան Դավիթ Մանոյանը։

Շվեդական «Գյոտեբորգը» ստուգողական խաղում 1։1 հաշվով է խաղացել «Վարբերգի» հետ։ «Գյոտեբորգի» կազմում ամբողջ հանդիպումն անցկացրել է պաշտպան Անդրե Կալիսիրը։

Բելառուսական «Լուչը» ստուգողական խաղում մրցել է ուկրաինական «Վոլինի» հետ։ Թիմերը մեկական գոլ են փոխանակել։ «Լուչի» կազմում երկրորդ խաղակեսին մասնակցել է դարպասապահ Արսեն Բեգլարյանը։

Յուրչենկոյից, Սարկիսովից եւ Մանոյանից բացի, բոլոր նշված ֆուտբոլիստները հրավեր են ստացել ազգային թիմից եւ կպատրաստվեն Բոսնիա-Հերցեգովինայի (մարտի 23) եւ Ֆինլանդիայի (մարտի 26) դեմ Եվրոպայի առաջնության ընտրական փուլի առաջիկա հանդիպումներին։